लुम्बिनी प्रदेशमा पहिलो चरणको कोरोना खोप ३९ हजारलाई
बुटवल।
लुम्बिनी प्रदेश सहित देशैभर आजदेखि कोभिडविरुद्धको खोप अभियान शुरु भएको छ ।
प्रदेशमा पहिलो चरणमा ३९ हजारभन्दा बढी व्यक्तिलाई कोभिडविरुद्धको खोप लगाउने तयारी सरकारले गरेको छ । पहिलो चरणमा यो खोप स्वास्थ्यकर्मी, सफाइकर्मी, एम्बुलेन्स र शव वाहनका चालकहरुलाई लगाउन थालिएको छ ।
खोप अभियानको आज बिहान लुम्बिनी प्रादेशिक अस्पताल, बुटवलमा मुख्यमन्त्री शङ्कर पोखरेलले शुभारम्भ गरे। लुम्बिनी प्रादेशिक अस्पतालमा पहिलो खोप अस्पतालका मेडिकल सुपरिटेन्डेन्ट डा. राजेन्द्र खनालले लगाएका छन् । उनले सर्वसाधारणमा खोपप्रतिको आशङ्का हटाउने सन्देशका लागि आफूले नै पहिलो खोप लगाएको बताए । सो खोपको दोस्रो डोज पुनः २८ दिनपछि लगाइने उनले बताए । डा. खनालका अनुसार लुम्बिनी प्रादेशिक अस्पतालका अधिकांश स्वास्थ्यकर्मी र सफाइकर्मीलाई यो खोप लगाइने छ ।
लुम्बिनी प्रदेशमा सरकारले ३९ हजार ४९५ जनाको लागि ८ हजार ७ सय ६८ भायल खोप आएको लुम्बिनी प्रदेश सामाजिक विकास मन्त्रालयका सूचना अधिकारी डा पुष्पराज पौडेलले जानकारी दिए । त्यसमध्ये सबैभन्दा बढी रुपन्देहीका लागि ३३ हजार ४ सय २० डोज छुट्याइएको छ । यो खोपको आज प्रदेशअन्तर्गत तराईका ६ जिल्लाका आठवटा खोप केन्द्रहरुमा शुभारम्भ गरिएको समेत उनले जानकारी दिए । प्रदेशका पहाडी जिल्लामा भने माघ १७ गतेबाट शुभारम्भ गरिने छ ।
लुम्बिनी प्रदेशअन्तर्गत आज शुरु गरिएका केन्द्रहरुमा रुपन्देहीको लुम्बिनी प्रादेशिक अस्पताल र भीम अस्पताल भैरहवा, बाँकेको भेरी अस्पताल नेपालगञ्जमा, दाङको राप्ती प्रादेशिक अस्पताल र राप्ती स्वास्थ्य विज्ञान प्रतिष्ठान र अन्य जिल्लामा भने सम्बन्धित जिल्लाका जिल्ला अस्पतालहरुमा केन्द्र तोकेर खोप सेवा शुरु गरिएको डा पौडेलले जानकारी दिए ।
लुम्बिनी प्रदेशमा मङ्गलबारसम्मको तथ्याङ्कअनुसार २७ हजार १८ जनामा कोरोना सङ्क्रमण देखिएको यसमध्ये २६ हजार १०४ जना निको भएर घर फर्किएका छन् भने हाल ५२९ जना उपचाररत रहेको मन्त्रालयको तथ्याङ्कमा उल्लेख गरिएको छ ।
