नाडाद्धारा महानगरीय ट्राफिकलाई ५ सय थान फ्लोरेसेन्ट ज्याकेट प्रदान
काठमाडौं । नाडा अटोमोबाइल्स एसोसिएसन्स अफ नेपाल (नाडा)ले महानगरीय ट्राफिक प्रहरीलाई पाँच सय थान फ्लोरोरेन्ट ज्याकेट उपलब्ध गराएको छ।
नाडा अध्यक्ष कृष्णप्रसाद दुलालको नेतृत्वमा गएको ६ सदस्यीय नाडा प्रतिनिधिमण्डलले महानगरीय ट्राफिक प्रहरी महाशाखाका प्रवक्ता प्रहरी उपरीक्षक श्याम अधिकारीसँग भेटी काठमाडौं उपत्यकाको ट्राफिक व्यवस्थापनमा देखिएका समस्याहरु र त्यसको निराकरणबारे छलफल समेत गरेको छ ।
छलफलमा महाशाखाका प्रवक्ता प्रहरी उपरीक्षक श्याम अधिकारीले काठमाडौं उपत्यकाको ट्राफिक व्यवस्थापनको सन्दर्भमा देखिएका विभिन्न समस्या र चुनौतीबारे चर्चा गर्दै नाडासंग मिलेर काम गर्न चाहेको बताए।
नाडाका अध्यक्ष दुलालले महानगरीय ट्राफिक प्रहरी महाशाखा र नाडा बीच विगतको समयदेखि नै हुदै आएको सहकार्यबारे चर्चा गरे। सोही क्रममा उनले महानगरीय ट्राफिक प्रहरी महाशाखाले राजधानीको ट्राफिक व्यवस्थापनमा देखाएको भूमिकाको प्रसंसा गर्दे यसलाई अझ थप सुधार गर्नुपर्ने खाँचो रहेको र नाडा त्यसका लागि सहयोग गर्न तयार रहेको बताए।
छलफलपछि नाडाका अध्यक्ष दुलालले महानगरीय ट्राफिक प्रहरी महाशाखाका प्रवक्ता प्रहरी उपरीक्षक श्याम अधिकारीलाई ट्राफिक व्यवस्थापनमा अझै सहज तथा सुरक्षित हुने ५ सय थान फ्लोरोसेन्ट ज्याकेट हस्तान्तरण गरे।
विगतमा पनि आफनो सामाजिक उत्तरदायित्व अन्तर्गत ट्राफिक प्रहरी तथा प्रहरी कार्यालयहरुलाई मोटरसाइकल, कुर्सी, ट्राफिक चिन्ह बोर्ड प्रदान गर्दै आएको नाडाले जानकारी दिएको छ।
नाडाले २०६७ साल देखि नै नाडाको प्रत्येक साधारण सभामा राजधानीका उत्कृष्ट ३ जना ट्राफिक प्रहरीलाई कदर पत्रसहित प्रोत्साहनस्वरुप जनही २५ हजार रुपैयाँ प्रदान गर्दै आएको छ।
उक्त छलफलमा नाडाका अध्यक्ष कृष्णप्रसाद दुलाल लगायत नाडाका उपाध्यक्ष करण चौधरी, उपाध्यक्ष आकाश गोल्छा, महासचिव सुनिल रिजाल, सहकोषाध्यक्ष विक्रम सिंहानियासमेतको उपस्थिति रहेको थियो।
