कर्णाली नदि किनारमा आमा छोराको शव भेटियो, छोरी अझै बेपत्ता
काठमाडौं । दैलेखमा चार सन्ताससहित हाम फालेको आशंका गरिएकी सुकि बडुवाल र उनका छोराको पनि शव भेटिएको छ । आठविस नगरपालिका–३ का सुकी बडुवाल र उनका छोरा ललित बडु्वालको शव कर्णाली नदि किनारमा मंगलबार भेटिएको हो ।
सोमबार बिहानदेखि हराइरहेका एकै परिवारका ५ जना मध्ये उनीहरूको शव भेटिएको हो। सुकीका दुई छोरीको सोमबार बेलुका डोरीले हात बाँधिएको अवस्थामा शव भेटिएको थियो।
सोमबार बेलुका १४ वर्षकी छोरी कल्पना बडुवाल र ११ वर्षकी सरिता बडुवाल माछा मार्न प्रयोग गर्ने डोरीमा हात बाँधिएको अवस्थामा एकै ठाउँमा मृत भेटिएका थिए । प्रहरीका अनुसार उनिहरु सबैको शव डोरिले हात बाँधिएको अवस्थामा कर्णाली नदि किनारमा भेटिएको हो ।
अहिलेसम्म कान्छी छोरी ५ वर्षीय रजनी बडुवालको शव नभेटिएको प्रहरीले जनाएको छ ।
आइतबार राति मदिरा सेवन गरी घर गएका श्रीमानसँग झगडा परेपछि सुकी सोमबार बिहानै चार छोराछोरीलाई साथमा लिएर घरबाट निस्किएकी थिइन्। उनले आफ्ना सन्तासहित कर्णाली नदीमा हाम फालेको आशंका गरिएको छ ।
