भारतमा बैंक कर्मचारीको हडताल
काठमाडौ ।भारतमा बैंक कर्मचारीहरूको संगठन बैंक युनियनले आह्वान गरेको दुई दिने हडताललाई त्यहाँका केन्द्रीय ट्रेड युनियनहरूले समर्थन जनाएका छन् ।
१५ र १६ मार्च दुई दिने हडतालको आह्वान बैंक युनियनले गरेको छ । यसबाट यी बैंकहरूको कामकाजमा असर पर्ने देखिएको छ ।
सोमबारदेखि शुरू हुने दुई दिने बैंक कर्मचारीहरूको हडताललाई समर्थन जनाउने ट्रेड युनियनहरूले बुधबार जीवन बिमा क्षेत्रका कामदारहरूले गर्ने हडताललाई पनि समर्थन गर्ने भएका छन् ।
यसका साथै ट्रेड युनियनहरूले मार्च २४देखि २६सम्म मजदुर किसानहरूको अधिकार विरूद्धका नीति विरूद्ध अभियान सञ्चालन गर्ने भएका छन् ।
संयुक्त किसान मोर्चाले बैंक र बिमाका कर्मचारीहरूले गर्ने हडतालको समर्थन गर्ने यो समूहमा १० केन्द्रीय ट्रेड युनियनहरू रहेका छन ।
अल इन्डिया ट्रेड युनियन कांग्रेसका महासचिव अमरजीत कौरले राष्ट्रिय सम्पत्तिको निजीकरणले निम्त्याउन एकाधिकारवादको विरोधको दिवसको रूपमा यो हडताल मजदुर किसानको समर्थनमा स्थापित हुने बताएका छन् ।
यो हडतालका बारेमा बैंकहरूले बैंकको सेवा दिन आवश्यक प्रवन्ध मिलाइएको जनाएका छन् ।
