पोस्टर टाँस्न ललितपुरमा निषेध
काठमाडौ । ललितपुर महानगरपालिकाले सहरलाई सुन्दर र सफा बनाउने अभियान अन्तर्गत घर र पर्खालका भित्ता, टेलिफोन, बिजुलीको खम्बालगायतका ठाउँमा पोस्टर पम्पलेट टाँस्न नपाउने गरी निषेध अभियान सञ्चालन गरेको छ ।
ललितपुर महानगरपालिका प्रमुख चिरीबाबु महर्जनले आफै खम्बामा टाँसिएका पोष्टर उप्काएर शुक्रबार सो अभियानको उद्घाटन गरेका हुन् ।साथै महानगरले सडकपेटीमा रोपिएको रुखमा ६ फिटसम्म हरियो रङ लगाउने अभियान आइतबारबाट सुरू गर्ने जानकारी प्रमुख महर्जनले घोषणा गरेका हुन् ।
शहरलाई फरक देखाउन, हरियाली प्रवद्र्धन गर्न र पोलमा जथाभावी पोस्टर टाँस्न आउनेलाई रोक्न यो अभियान थालेको उनले बताए ।
महानगरको यो निर्णयलाई अवज्ञा गरे कडा कारबाही गरिने उनले चेतावनी पनि सार्वजनिक गरेका छन् ।
हरियोमा सेतो रङ हुँदा सडकमा सवारी चलाउन समेत सजिलो हुने अपेक्षा महानगरले गरेको छ ।
महानगरले तत्काल यो काम बाग्मती पुलबाट जवालाखेल लगनखेलहुँदै सातदोबाटोसम्म, हिमालय होटेल , पाटनढोका, अशोक हल, क्वाल्खुहुँदै मंगलबजार, लगनखेलसम्म र पुल्चोक महानगरपालिका कार्यालयबाट मंगलबजार हुँदै ग्वार्कोसम्म गर्नेछ।
नगरप्रमुख महर्जनले पहिलो चरणमा यी रूटमा काम सके लगत्तै सबैतिर यो काम थाल्ने योजना खुलाए ।
