नेपालबाट तेस्रो मुलुक जाने भारतीय नागरिकलाई एनओसी नचाहिने,कोरानाको ठूलो जोखिम
काठमाडौं । भारतीय नागरिकहरूलाई विदेश छिर्न बन्देज लगाएपछि नेपाल भएर विदेश छिराउने योजना बनाइएको देखिएको छ ।
भारतीय राहदानी लिएर नेपाल छिरेका भारतीय नागरिकका लागि नो अब्जेक्सन सर्टिफिकेट(एनओसी ) नचाहिने भएको छ । यो प्रावधान २२ अप्रिल २०२१देखि १९ जुन २०२१सम्मका लागि गरिएको छ ।
भारतीय दूतावासले सार्वजनिक गरेको सूचना अनुसार स्थलगत वा हवाईबाटो भएर राहदानी बोकी नेपाल आएका भारतीय नागरिकहरूलाई नेपाल भएर तेस्रो मुलुक जान एनओसीको आवश्यकता नहुने उल्लेख छ ।
तर राहदानी बाहेकका अन्य परिचय पत्र बोकेका भारतीय नागरिकहरूका लागि एनओसी चाहिने जनाइएको छ । त्यसका लागि काठमाडौस्थित भारतीय दूतावासको कार्यालयमा सम्पर्क गर्न सकिने उल्लेख गरिएको छ ।
Notice regarding No Objection Certificate (NOC) to Indian Nationals travelling to third countries from Nepal. pic.twitter.com/mQLEBy7DX9
— IndiaInNepal (@IndiaInNepal) April 21, 2021
यसबारे त्रिभुवन विमानस्थल प्राधिकरणलाई यसको जानकारी दिइसकिएको जनाउँदै सो सूचनामा नेपाल भएर तेस्रो मुलुक जान कुनै असुविधा भए सम्पर्क गर्न फोन नम्बर पनि दिइएको छ । नेपाल भएर तेस्रो मुलुक जाने भारतीय नागरिकहरूले केही अप्ठयारो भएको बेला दूतावासमा सम्पर्क गर्न सकिने उल्लेख गरिएको छ ।
भारतमा कोरोना संक्रमण द्रुतगतिमा फैलिरहेको समाचार सार्वजनिक भएसँग अमेरिका र बेलायत लगायतका देशमा भारतीय नागरिकको प्रवेशमा रोक लगाइएको छ भने भारत भ्रमणमा अमेरिकी नागरिकलाई नजान हवाई चेतावनी सार्वजनिक गरिएको छ ।
