नेपालको आर्थिक वृद्धिदर ३ प्रतिशत : एडीबी
काठमाडौं । एसियाली विकास बैंक (एडीबी)ले चालू आर्थिक वर्ष २०७७/७८ मा नेपालको आर्थिक वृद्धिदर ३.१ प्रतिशत रहने जनाएको छ ।
बैंकले बुधबार सार्वजनिक गरेको ‘एसियन डेभलमेन्ट आउटलूक-२०२१’मा गत वर्ष (सन् २०२०) मा नेपालको आर्थिक वृद्धिदर कोभिड-१९ प्रभावका कारण १.९ प्रतिशतले ऋणात्मक रहे पनि गत साउनमा लकडाउन हटाइएपछि चालू वर्ष २०२१ मा केही बहाली भइ ३.१ प्रतिशत कायम हुने जनाइएको छ ।
बैंकले नेपालमा कोभिड-१९ को दोस्रो छाल संक्रमण दर बढेसँगै सरकारले थालेका रोकथामका कडा उपायहरूका कारण अहिले गरिएको पूर्वानुमानभन्दा वृद्धिदर कम हुने जनाएको छ ।
बैंकका अनुसार चालू आर्थिक वर्षमा कृषि क्षेत्रको वृद्धिदर २.४ प्रतिशत पुग्ने, औद्योगिक क्षेत्रको वृद्धिदर २.५ प्रतिशत रहने र सेवा क्षेत्रको वृद्धिदर ३.४ प्रतिशत रहने जनाएको छ ।
मनसुनले साथ दिएको र धान खेती गरिएको क्षेत्रफलमा धानको उत्पादन १.३ प्रतिशतले बढेका कारण कृषि क्षेत्रको समग्र वृद्धिदर पनि गत वर्षका तुलनामा बढेको बैंकको भनाइ छ ।
बैंकका अनुसार चालू आर्थिक वर्षमा ३ प्रतिशतमा खुम्चिएको आर्थिक वृद्धिदर आगामी वर्ष भने बहाली भइ ५.१ प्रतिशत कायम हुने बैंकले जनाएको छ ।
