काठमाडौं उपत्यकामा निषेधाज्ञा सुरु
काठमाडौं । काठमाडौं उपत्यकामा निषेधाज्ञा सुरु भएको छ।
कोरोना संक्रमण बढ्दै गएपछि त्यसलाई रोक्न काठमाडौं,भक्तपुर र ललितपुरमा आज बिहान ६ बजेदेखि वैशाख २२ गते राति १२ बजेसम्मका लागि निषेधाज्ञा सुरु भएको हो ।
तीन जिल्लाका प्रमुख जिल्ला अधिकारीहरूले सुरुमा एक हप्ता वैशाख २२ गतेसम्मका लागि निषेधाज्ञा लागु गरेको भएपनि मन्त्रिपरिषदको बैठकले १५ दिन तोकेको थियो । पहिलो चरणको निषेधाज्ञा सकिएपछि दोस्रो चरणको निषेधाज्ञा सुरु हुने छ ।
केके खुल्ला छ ?
निषेधाज्ञाको अवधिमा उपत्यका भित्र विवाह, व्रतबन्ध लगायतमा बेहुला–बेहुली पक्षका गरी बढीमा १५ जना सहभागी हुन सक्ने छन् भने विवाहको ब्यानरसहित दुई वटासम्म गाडी प्रयोग गर्न सक्ने छन् ।
विवाह–व्रतवन्धका लागि स्थानीय तहको सिफारिस अनुसार जिल्ला प्रशासन कार्यालयले पास उपलब्ध गराउँछ ।
विकास निर्माणमा प्रयोग हुने जनशक्ति र सामग्री ढुवानीका साधनको हकमा सबन्धित आयोजना वा कार्यालय प्रमुखको सिफारिसका आधारमा जिल्ला प्रशासन कार्यालयले दिने पास लिएर सञ्चालन गर्न पाइने छ ।
सरकारी कार्यालयलगायत सार्वजनिक सेवा प्रदायक संस्थाले सम्बन्धि मन्त्रालय वा विभागबाट जारी पास लिएर सवारीसाधन प्रयोग गर्न पाउने छन् ।
डिपार्टमेन्टल स्टोर, खाद्य सामग्रीका पसल, व्यवसाय बिहान १० बजेसम्म र बेलुका ५ बजेदेखि ७ बजेसम्म सन्चालन गर्न पाइने छ ।
बैंक तथा वित्तीय संस्था, बिमा एवम् राष्ट्र बैंकबाट इजाजत प्राप्त वित्तीय कारोबार गर्ने सहकारी संस्थाका कर्मचारीले प्रयोग गर्ने निजी नम्बर प्लेटका सवारीसाधन सम्बन्धित कार्यालयको परिचयपत्रका आधारमा आवतजावत गर्न पाइने छ ।
अत्यावश्यक सामग्री बोकेका ढुवानीका साधन, बिरामी तथा बढीमा दुई कुरुवा बोकेका एम्बुलेन्स, स्वास्थ्यकर्मी तथा सुरक्षा निकायका सवारीसाधन सञ्चालन गर्न पाइने छ ।
एम्बुलेन्स, खानेपानी, स्वास्थ्य, खाद्यान्न, तरकारी, फलफूल, दूध तथा दूग्धजन्य पदार्थ, कुरिअर एवम् डाँक सेवा, बैंक तथा वित्तीय संस्था, दूरसञ्चार, इन्टरनेट, क्वारेन्टिन, आइसोलेसन, फोहोरमैला व्यवस्थापनलगायत ढुवानी तथा यातायतका साधनमा सञ्चालन गर्न पाइने छ ।
पत्रकारहरुको हकमा सूचना विभाग, नेपाल पत्रकार महासंघ र सञ्चार गृहले उपलब्ध गराएको प्रेस पासका आधारमा आउ–जाउ गर्न पाइने छ ।
अस्पताल आउने–जाने बिरामी र कुरुवा, मृत्यु संस्कारमा अनिवार्य रूपमा सहभागी हुनुपर्ने अवस्थाका व्यक्तिहरुलाई पनि प्रमुख जिल्ला अधिकारीले दिएको पासका आधारमा गाडी प्रयोग गर्न पाइने छ ।
केकेमा रोक लगाइएको छ ?
सबै प्रकारका सभा, सम्मेलन, गोष्ठी, तालिम, सेमिनाटर, सिनेमा हल, पार्टी प्यालेस, स्विमिङ पुल, शपिङ मल, मनोरञ्जन स्थल, सैलुन, ब्यूटी पार्लर, जिमखाना, समूहमा खेलिने खेलकुद, पुस्तकालय, संग्रहालय, चिडियाखाना सञ्चालन गर्न निषेधाज्ञा अवधिभर रोक लगाइएको छ ।
खाद्य सामग्री र औषधि तथा स्वास्थ्य सामग्रीसम्बन्धी पसल, व्यवसायबाहेक अन्य पसल, व्यवसाय सञ्चालन पाइने छैन ।
अत्यावश्यक बाहेकका सार्वजनिक तथा निजी सवारीसाधन चलाउन र अत्यावश्यक बाहेकका अन्य सार्वजनिक सेवा सञ्चालन गर्न पनि रोक लगाइएको छ ।
