बाँकेमा निषेधाज्ञा थप, बैंक भने अब दैनिक ३ घण्टा खुल्ने
बाँके। बाँकेमा जारी निषेधाज्ञा थप गरिएको छ । बैशाख १३ गते राती १२ बजेदेखि निषेधाज्ञा जारी गरिएकोमा संक्रमण नघटेपछि बैशाख २७ गते राती १२ बजे सम्मका लागि थप गरिएको जिल्ला प्रशासन कार्यालय बाँकेले जनाएको छ ।
कार्यालयले एक सूचना जारी गरी कोरोना संक्रमणको साङलो तोड्न भन्दै निषेधाज्ञा जारी गरिएकोमा संक्रमण दरमा कमी नआएका कारण आदेशलाई निरन्तरता दिईएको जनाएको छ ।
यसअघि बैंकका सेवासमेत पूर्णरुपमा बन्द रहेकोमा अब सिमित संख्याका कर्मचारी राखेर दैनिक तीनघण्टा सञ्चालन गर्ने व्यस्था मिलाइएको छ ।
संक्रमण बढेपछि बैशाख ९ गते देखि नेपालगन्जमा निषेधाज्ञा जारी गरिएको थियो । त्यसयता संक्रमण जिल्लाभरी फैलिन थालेको भन्दै बाँकेमा बैशाख १३ गते देखि निषेधाज्ञा जारी गरिएको छ ।
कोरोना संक्रमणका कारण बाँकेमा हालसम्म १३७ जनाको मृत्यु भईसकेको छ भने बाहिरी जिल्लावाट उपचारका लागि आएका १२२ जनाले कोरोनाका कारण ज्यान गुमाईसकेका छन् ।
