रोल्पाको गंगादेव गाउँपालिकाद्वारा सबै सीमा नाका बन्द
रोल्पा । रोल्पाको गंगादेव गाउँपालिकाले सबै सीमा नाका बन्द गरेको छ ।
जनप्रतिनिधि र कर्मचारी गरेर एकैपटक ४२ जनामा कोरोना संक्रमणको पुष्टि भएपछि अर्को सूचना जारी नभएसम्मका लागि गाउँपालिका भित्रने सबै नाका बन्द गरेको हो ।
गाउँपालिका भित्रका स्वास्थ्य ,एम्बुलेन्स,खाद्यान्न गाडी बाहेक सम्पूर्ण कार्यालय ,यातायात ,विद्यालय ,बैंक,वित्तीय संस्था ,बजार पनि बन्द गरिएको गाउँपालिकाका प्रेस संयोजक आशोक ओलीले जानकारी गराएका छन् ।
गाउँपालिकाले गंगा मा.वि चौतारामा आइसोलेसन बनाउन सुरु गरेको समेत प्रेस संयोजक ओलीले बताए ।
गाउँपालिकाले कोरोना विरुद्ध सबैले सतर्कता अपनाएर मात्रै जित्न सकिने भएकोले , स्वास्थ्य मापदण्ड पालन गर्न ,गराउन र सिमा नाकाहरुमा कडाइ गर्न जनप्रतिनिधि ,सुरक्षा कर्मी ,आमनागरिक सरोकारवाला सबैमा अपिल गरेको छ ।
गंगादेव गाउँपालिकामा कारोना संक्रमित एक जनाको समेत मृत्यु भइसकेको छ ।
