कोरोना संक्रमण नियन्त्रणका लागि ‘नयाँ कदम’ आवश्यक : स्वास्थ्य मन्त्री त्रिपाठी
काठमाडौं । स्वास्थ्य तथा जनसङ्ख्यामन्त्री हृदयेश त्रिपाठीले कोभिड–१९ को रोकथाम, उपचार र नियन्त्रणका लागि नयाँ कदम आवश्यक रहेको बताएका छन् ।
मन्त्रालयले आज गरेको भर्चुअल पत्रकार सम्मेलनमा मन्त्री त्रिपाठीले कोभिड–१९ को रोकथाममा अहिलेको चालिएको कदम पर्याप्त नहुने भन्दै स्वास्थ्य संकटकाल वा लकडाउन आवश्यक रहेको बताए ।
उनले भने ,“ सो सम्बन्धमा सामूहिक निर्णय आवश्यक हुन्छ ।”
उनले अहिलेको अवस्थामा दोस्रो लहरको सङ्क्रमण यही गतिमा बढे सरकारसंँग भएका सघन उपचार कक्ष, हाइ डिपेन्डेन्सी युनिट र भेन्टिलेटरले थेग्न नसक्ने चेतावनी दिए । उनले महामारी क्रमशः उकालो लागिरहेकाले सबैलाई सचेत रहन आग्रह गर्दै मुलुकमा अहिले अक्सिजन ग्यासको अभाव रहेकाले कालाबजारी नगर्न अनुरोध गरे ।
मन्त्री त्रिपाठीले कोभिड–१९ विरुद्धको खोपका सम्बन्धमा नबुझी जथाभावी नबोल्न आग्रह गरे ।
“खोप खरीदमा सरकारले कसैलाई पनि कमिशन दिएको छैन, ” उहाँले भन्नुभयो, “सरकारले प्रत्यक्ष खोप उत्पादक कम्पनीसंँग चार डलरमा खरीद गरेको हो ।”
उनले ‘कोभिशिल्ड’ खोप उत्पादन कम्पनी सिरम इन्सिच्युट अफ इण्डियामा आगलागी र भारतमा सङ्क्रमण फैलिएकाले नेपालले खरीद गरेको १० लाख मात्रा खोप नआएको प्रष्टिकरण दिए । “भारतमा पनि सङ्क्रमण बढेर निर्यात गर्न दिइएको छैन, ” उहाँले भन्नुभयो, “ भारतले निर्यातका लागि अनुमति दिएपछि नेपालमा खरीद गरिएको १० लाख मात्रा खोप आउँछ ।”
उनले खोप नेपाल ल्याउनका लागि नेपालस्थित अमेरिका, रुस, चीन र बेलायतका राजदूतावाससंँग परराष्ट्र मन्त्रालयले छलफल गरिरहेको जानकारी दिए ।
मन्त्रालयका सचिव लक्ष्मण अर्यालले स्वास्थ्य संकटकाल लगाउनेबारे मन्त्रालयले सुझाव दिइसकेकाले अब सरकारले नै आवश्यकताका आधारमा घोषणा गर्न सक्ने बताए । उनले स्वास्थ्यसम्बन्धी सामग्री, उपकरण खरीद र जनशक्ति व्यवस्थापनका लागि अर्थ मन्त्रालयसंँग १४ अर्ब रुपैयाँ आजै सुनिश्चित गरिएको जानकारी दिए ।
