कांग्रेस जिल्ला सभापतिहरूको निष्कर्ष : सरकारकै कारण कोरोनाको भयावह अवस्था आयो
काठमाडौ । नेपाली कांग्रेसका जिल्ला सभापतिहरूको भर्चुअल भेलाले सरकारको ढिलासुस्तीकै कारण अहिलेको भयावह अवस्था सिर्जना भएको निष्कर्ष निकालेको छ ।
भर्चुअल माध्यमबाट सम्पन्न तेत्तीस जिल्लाका कांग्रेस सभापतिहरूले सरकारकै बेवास्ता र लापरबाहीले कोभिड नियन्त्रणमा समस्या देखिएको भन्दै चिन्ता व्यक्त गरेको छ ।
भेलाले जनताको जीवन रक्षा सरकारको पहिलो प्राथमिक हुने पर्नेमा जोड दिएको छ ।
समसामयिक राष्ट्रिय राजनीति, कोभिड १९ को अवस्था र पार्टीको १४ औं महाधिवेशनको सम्बन्धमा छलफल केन्द्रित रहेको पूर्व राज्यमन्त्री एवम् नेपाली कांग्रेस रोल्पाका सभापति अमरसिंह पुनमगरले जानकारी दिए ।
कोभिड-१९ को नियन्त्रण र जनस्वास्थ्यको उचित व्यवस्थापनको लागि सरकारलाई दबाब दिने, पार्टी नेतृत्वलाई आवस्यकताको आधारमा राष्ट्रिय भूमिका खेल्न अनुरोध गर्ने र पार्टीको १४ औं महाधिवेशन तोकिएको समयमै गर्न चौतर्फी दबाब सिर्जना गर्ने एवम् देशभरका कांग्रेस जिल्ला कार्यालयलाई आइसोलेशन एवम् क्वारेन्टाइन बनाउन पहल गर्ने निर्णय भएको पुनले बताए ।
कांग्रेस रोल्पाका सभापति अमरसिंह पुनको संयोजनमा भएको भेलाको सहजीकरण कांग्रेस काभ्रेका सभापति मधु आचार्यले गरेका थिए ।
भेलामा सिन्धुपालचोक सभापति विकास लामा, पाँचथर सभापति नरेन्द्र केरुङग्, ताप्लेजुङ सभापति लिला बोखिम, तेह्रथुम सभापति गोबिन्द ढुगाना,शंखुवासभा सभापति दिपन कुमार श्रेष्ठ, सुनछरी सभापति राजिब कोइराला, सिरहा सभापति रामचन्द्र यादव, सर्लाही सभापति नगेन्द्र राय, पर्सा सभापति अजय दुबेदी सहभागि थिए ।
त्यस्तै काठमाडौ सभापति कृष्ण सबुज बानियाँ, धादिङ सभापति रमेश धमाला, तनहुँ सभापति बैकुन्ठ न्यौपाने, कास्की सभापति कृष्ण के सी, चितवन सभापति जितनारायण श्रेष्ठ, नवलपुर सभापति बिस्नु लामिछाने, गुल्मी सभापति भुवन प्रसाद श्रेष्ठ, अर्घाखाँची सभापति बिष्णु मुस्कान खनाल, प्यूठान सभापति अमरप्रसाद भण्डारी कपिलवस्तु सभापति सुरेन्द्र राज आचार्य, बर्दिया सभापति संजय गौतम, बांके सभापति किरण कोइराला, सुर्खेत सभापति कमलराज रेग्मी र दैलेख सभापति कृष्ण कुमार बिसीको उपस्थिति रहेको पुनले जानकारी दिए ।
