त्रिभुवन विश्वविद्यालय स्नातक तह प्रथम वर्षको परीक्षा आवेदन फर्म अनलाइनबाट भर्न सकिने

काठमाडौं । त्रिभुवन विश्वविद्यालयको वार्षिक परीक्षा प्रणाली अनुसार स्नातक तह प्रथम वर्षको परीक्षा आवेदन फर्म अनलाइनबाट भर्न सकिने भएको छ ।

परीक्षा नियन्त्रण कार्यालयले आज एक सूचना निकाल्दै परीक्षा आवेदन फर्म अनलाइनबाट भर्न मिल्ने जानकारी गराएको हो । कोभिडका कारण परीक्षा अवेदन फर्म भर्ना स्थगित गरिएको थियो ।

त्रभुवन विश्वविद्यालयको विज्ञप्तिमा भनिएको छ,“क्याम्पस र परीक्षार्थीबाट भरिएका सम्पूर्ण फारामहरु क्याम्पसले रुजु गरी सोको रकम भुक्तानी गरी २०७८ जेठ २३ सम्म इन्ट्री गरिसक्नु पर्नेछ ।”

२०७८ साल जेठ १० देखि जेठ २० सम्म क्याम्पसमा संकलन भएका आवेदन फर्महरु सम्बन्धित क्याम्पसबाट भराउने र आवेदन फाराम छुट भएका विद्यार्थीहरुको आवेदन जेठ १२ गतेबाट २० गतेसम्म अनलाइनबाट परीक्षार्थी स्वयंले भर्न सक्ने विज्ञप्तिमा उल्लेख छ ।

अनलाइन फाराम www.tuexam.edu.np मा अनलाइन फर्ममा क्लिक गरी निर्देशन अनुसार भर्न सकिनेछ। ०७८ साल जेठ २४ गतेबाट फर्म भर्न प्रयोग हुने वेभसाइट बन्द गरिने र दोब्बर दस्तुर बुझाइ फर्म भर्ने अवधि असार १ गतेबाट ७ गतेसम्मका लागि रहने विश्वविद्यालयले सूचनामा उल्लेख गरेको छ ।