विश्वका १२५ देशमा ३२ लाख नेपाली, भारतमा झन्डै १० लाख
काठमाडौं । विश्वका १२५ देशमा ३२ लाख नेपालीहरू रहेको र तीमध्ये ६ लाख नेपाली काेभिड-१९ जनित संकटका कारण नेपाल फर्कने अवस्थामा रहेको एक अध्ययनले देखाएको छ । राष्ट्रिय योजना आयोगले तयार पारेको अध्ययन प्रतिवेदनअनुसार गत वर्षको को पाँच महिने लकडाउनका अवधिमा भारतबाट ३ लाख ६६ हजार १५३ जना र अन्य मुलुकबाट ३७ हजार ४२४ जना र ४ लाख नेपाली स्वेदश फर्केका थिए ।
प्रतिवेदनले कोभिड-१९ जन्य संकटका कारण ६ लाख १८ हजार ७०० नेपाली नेपाल फर्कन चाहेको र तीमध्ये ३ लाख ६० हजार नेपाली तत्कालै नेपाल फर्कने अवस्थामा रहेको देखाएको छ ।
अध्ययनअनुसार भारतमा सबैभन्दा बढी ९ लाख ७८ हजार, त्यसपछि कतारमा ३ लाख ६० हजार, मलेसियामा ३ लाख २५ हजार, साउदी अरबमा ३ लाख २० हजार, यूएईमा २ लाख ७५ हजार नेपाली छन् ।
यसैगरी, अमेरिकामा २ लाख ५ हजार १८७ जना, बेलायतमा १ लाख ५० हजार, जापानमा ९२ हजार ८ सय, अस्ट्रेलियामा ८० हजार, कुबेतमा ६९ हजार ६ सय र क्यानडामा ५० हजार नेपाली रहेको योजना आयोगको अध्ययनमा उल्लेख छ ।
