सिन्धुपाल्चोक बाढी : ७ जना बेपत्ता १ जनाको मृत्यु, ६० जनाको उद्धार
काठमाडौं । सिन्धुपाल्चोकको बाढीमा परेर अहिलेसम्म ७ जना बेपत्ता र १ जनाको मृत्यु भएको खुलेको छ ।
जिल्ला प्रशासन कार्यालयले प्रेस विज्ञप्ती जारी गर्दै अहिलेसम्म ७ जना वेपत्ता र १ जनाको मृत्यु भएको र ६० जनाको उद्धार गरिएको जानकारी गराएको हो ।
मृतकको पहिचान खुल्न सकेको छैन भने बेपत्ता हुनेमा हेलम्बु गाउँपालिका वडा नं. २ का माधव भण्डारी, गणेश ज्योती, हेलम्बु गाउँपालिका वडा नं. ३ का टिकामाया खड्का, वडा नं. ७ का ज्ञानेन्द्र कक्षपती, वडा नं. ६ का च्याङा तामाङ र उनीकी श्रीमती र साँगाचोकगढी नगरपालिका वडा नं. ६ का सुरेन्द्र नेपाल रहेका छन् ।
सिन्धुपाल्चोकको पाँचपोखरी थाङपाल गाउँपालिका वडा नं. ३ को भोताङ स्थिति लार्केमा गएको पहिरोले मेलम्ची नदी थुनिएपछि बाढी आएको सिन्धुपाल्चोकका सहायक प्रमुख जिल्ला अधिकारी बाबुराम खनालले जनाएका छन् ।
थुनिएको नदीको बाध फुटेपछि आएको बाढी हेलम्बु र मेलम्ची क्षेत्रमा पसेको थियो । उद्धार गरिएकालाई उपचारका लागि काठमाडौं पठाइएको प्रमुख जिल्ला अधिकारी खनालले जानकारी दिए ।
