नेपाललाई खोप किन्न एडीबीको १९ अर्ब ६५ करोड रुपैयाँ ऋण
काठमाडौं। नेपाललाई कोभिड–१९ विरुद्धको खोप किन्नका लागि एसियाली विकास बैंक (एडीबी)ले १९ अर्ब ६५ करोड रुपैयाँ (१६ करोड ५० लाख अमेरिकी डलर) बराबरको ऋण दिने भएको छ ।
बैंकले ६८ लाख मानिसलाई १ करोड ५९ लाख खोपको मात्रा दिने गरी तयार पारिएको राष्ट्रिय परिचालन तथा खोप योजना नेपालका लागि आवश्यक हुने खर्चका लागि यो ऋण अनुमोदन गरिएको जनाएका छन् ।
एडीबीको ९ अर्ब अमेरिकी डलर बराबरको एसिया प्रशान्त खोप पहुँच सुविधा डिसेम्बर २०२०को तर्फबाट यो परियोजनामा ऋण स्वीकृत गरिएको हो । विकासशील देशहरूमा लागि द्रुतगतिमा समानरूपमा सबैलाई खोप उपलब्ध गराउने योजना अन्तर्गत यो सुविधा कोष स्थापना गरिएको बैंकले बताएको छ ।
कोभिड–१९को खोप विश्वव्यापी पहुँच कार्यक्रम कोभ्याक्सबाट खोप खरिद गरिनेछ । विश्व स्वास्थ्य संगठन (डब्लुएचओ)बाट सूचीकृत गरिएका यो कोभ्याक्स संयन्त्रको खोप खरिद गरिने जनाइएको छ ।
यसका अतिरिक्त एडीबीले खोपको आपूर्ति प्रणालीका लागि जारी प्राविधिक सहयोग,सञ्चार तथा कोभिड-१९ को जोखिमबारे जनचेतना अभिवृद्धिमा समुदायलाई संलग्न गराउन तथा खोपका लाभबारे जानकारी दिन समेत सहयोग गर्ने जनाइएको छ।
हाल सरकारले महिला स्वस्थ्य स्वयंसेविकालाई सिमान्तकृत समुदायमाा जनचेतना जगाउन परिचालन गरिरहेको छ । यसअन्तर्गत कम्ती एक महिला स्वास्थ्य कार्यकर्ता वा स्वयम सेविका हरेक खोप केन्द्रमा उपस्थित गराउन यो सहयोग गरिनेछ ।
एडीबीले विश्व बैंक, कोभ्याक्स, डब्लुएचओ, र संयुक्त राष्ट्र संघको बालबालिका कोष (युनिसेफ)जस्ता साझेदारसँग मिलेर नेपाल सरकारको द्रूत सञ्चालन गर्ने कार्यक्रममा सहयोग गर्ने विज्ञप्ति जारी गरी जनाएको छ ।
बैंकका अनुसार नेपाल सरकारको १ अर्ब २० करोड अमेरिकी डलर बराबरको राष्ट्रिय उद्धार कार्यक्रमको यो परियोजना पूरक हुनेछ, जसमा सामाजिक संरक्षण, स्वास्थ्य हेरचाह र आर्थिक राहत मापदण्डहरू समावेश छन् । यसमा एडीबीले मे २०२० मा २५ करोड अमेरिकी डलर बराबरको सहुलियत दरको ऋण उपलब्ध गराएको थियो ।
एडीबीका अध्यक्ष मासात्सुगु आसाकावाले महामारी फैलिन नदिनका लागि नेपाललाई आफ्ना नागरिकलाई आवश्यक खोप दिन यो ऋणले नेपाल सरकारलाई सहयोग पुग्ने बताएका छन् ।
खोप खरिद गरी जतिसक्दो छिट्टो नागरिकलाई खोप दिएर अर्थतन्त्रलाई फेरि बाटोमा ल्याउन र जीविकोपार्जन गर्न तथा आर्थिक गतिविधिका साथै शैक्षिक संस्थान तथा मावन विकास कार्यक्रमका लागि खोप अपरिहार्य भएको उनको भनाइ छ ।
