बालुवाटार जग्गा प्रकरणमा अख्तियारको एक्सनः तीन पूर्वमन्त्रीसहित १ सय ७५ जनाविरुद्ध भ्रष्टाचार मुद्दा

काठमाडौं । अख्तियार दुरुपयोग अनुसन्धान आयोगले ललिता निवासको जग्गा प्रकरणमा तीन पूर्वमन्त्रीसहित १ सय ७५ जनाविरुद्ध भ्रष्टाचार मुद्दा दर्ता गरेको छ । बुधबार आयोगले कांग्रेसका उपसभापति तथा संसदीय दलका उपनेता विजयकुमार गच्छदारसहित १ सय ७५ जनाविरुद्ध विशेष अदालतमा मुद्दा दायर गरेको हो ।

सरकारी जग्गा व्यक्तिको नाममा पारेको यस चचिर्त प्रकरणमा आयोगले गच्छदार, पूर्वसचिव एवं अख्तियारका पूर्वप्रमुख आयुक्त दीप बस्न्यात, डम्बर श्रेष्ठसहित भ्रष्टाचारको मुद्दा दायर गरेको हो ।

गच्छदार भौतिक पूर्वाधारमन्त्री रहेका र बस्न्यात उक्त मन्त्रालयमा सचिव रहेका बेला प्रधानमन्त्री निवास विस्तार गर्ने निर्णय गर्दा बालुवाटारको सरकारी जग्गा नक्कली मोही खडा गरेर व्यक्तिको नाममा सारिएको थियो ।

यो मामिलामा अन्य दर्जनौँ पूर्वपदाधिकारी जोडिएका छन् । उनीहरुविरुद्ध उच्च अदालतमा मुद्दा दायर गरिएको जनाइएको छ । यसैबीच गच्छदारको संसद पद स्वतः निलम्बित भएको छ। बालुवाटारस्थित ललितानिवास जग्गा प्रकरणमा मुछिएपछि उनको सांसद पद निलम्बित भएको हो ।
आयोगले विशेष अदालतमा मुद्दा दायर गरेपछि गच्छदारको संसद पद स्वतः निलम्बनमा परेको हो। भ्रष्टाचार निवारण ऐन २०५९ अनुसार अदालतमा मुद्दा दायर भएपछि संसद्को पद स्वतः निलम्बनमा पर्ने उल्लेख गरेको छ।