कृषि सचिवमा गोविन्दप्रसाद शर्माको बढुवा

काठमाडौं । कृषि तथा वन सेवातर्फका सहसचिव गोविन्दप्रसाद शर्मा सचिवमा बढुवा भएका छन् ।

आज बसेको मन्त्रिपरिषद् बैठकले शर्मालाई सचिवमा बढुवा गरेको हो ।  उनी यसअघि कृषि विभागको महानिर्देशकको रुपमा कार्यरत    थिए ।

शर्मालाई सचिवमा बढुवा गरी कृषि तथा पशुपंक्षी विकास मन्त्रालयको कृषि सचिवमा पदस्थापन गर्ने निर्णय गरेको सरकारका प्रवक्ता कानुनमन्त्री ज्ञानेन्द्रबहादुर कार्कीले जानकारी दिए । डा. योगेन्द्रकुमार कार्की सेवानिवृत्त भएपछि कृषि सचिव रिक्त भएको थियो ।

सोही रिक्त पदमा शर्मालाई बढुवा गर्न बढुवा समितिले साउन २४ गते मन्त्रिपरिषदसमक्ष सिफारिस गरेको थियो । सोही सिफारिस अनुसार शर्मा सचिव नियुक्त भएका हुन् ।