सिन्धुपाल्चोकको प्रहरी चौकीमा आक्रमण, दुई प्रहरी घाइते
कठमाडौं । शनिबार मध्यराति सिन्धुपाल्चोकको प्रहरी चौकीमा आक्रमण भएको छ । अज्ञात समूहले तिपेनीमा रहेको प्रहरी चौकीमा अन्धाधुन्ध आक्रमण गर्दा चौकीका इञ्चार्ज सहित दुई प्रहरी घाइते भएका छन् । अज्ञात समूहको आक्रमणबाट प्रहरी चौकीका इञ्चार्ज असई सन्तोषकुमार झा र प्रहरी हबल्दार हरिबहादुर मगर घाइते भएका छन् ।
शनिबार राति १ बजेको समयमा १०/१२ वटा मोटरसाइकलमा आएका समूहले एक्कासि प्रहरी चौकीमा ढुङगामुडा गरेका थिए ।
प्रहरीले आत्मरक्षाको लागि चार राउण्ड हवाइ फायर गरेको थियो । आक्रमणमा संलग्गन मध्ये एक जना र दुई मोटरसाइकाल नियन्त्रणमा लिएको प्रहरी निरीक्षक घिमिरेले जानकारी दिए ।
घटना लगतै इलाका प्रहरी कार्यालयबाट प्रहरी निरीक्षकको कमाण्डमा थप मदत तिपेनीमा गएको छ । जिल्ला प्रहरी प्रमुख एसपी प्रज्वल महर्जन पनि राती नै घटनास्थलमा पुगेका छन् ।
प्रहरी चौकीमा किन आक्रमण गरियो भन्ने अहिलेसम्म थाहा हुन सकेको छैन । प्रहरीले अनुसन्धान शुरु गरेको छ ।
