माग पूरा गराउन भन्दै लोसपा सरकारमा जाने
काठमाडौं । माग पूरा गराउन भन्दै लोकतान्त्रिक समाजवादी पार्टीले (लोसपा)सरकारमा जाने निर्णय गर्ने भएको छ ।
लोसपाको बिहीबार बसेको केन्द्रीय कार्यकारिणी समितिको बैठकमा समसामयिक राजनीतिक अवस्थाका बारेमा छलफल गरिएको सहभागी नेताहरूले बताएका छन् ।
लोसपाका कार्यकारिणी समिति सदस्य केशव झाले बिहीबारको बैठक पछि पत्रकारहरूसँगको कुराकानीमा सरकारले दल विभाजनसम्बन्धी विधेयक ल्याएर ठूलो सहयोग गरेको बताएका थिए । तर सरकारमा सहभागी हुने विषयमा कुनै ठोस निष्कर्ष ननिस्केको उनले जनाए ।
यसअघि ओलीको नेतृत्वमा सरकारमा राजेन्द्र महतोको नेतृत्वमा ठाकुर पक्ष सहभागिता जनाएको थियो । यसपटक महतोको नेतृत्वमा सरकारमा जाने कुरो नभएको ठाकुर निकट एक नेताले जनाए । ठाकुर पहिले पनि सरकारमा सामेल नहुने अडानमै रहेका थिए । तर पछि सरकारमा जाने नेताहरूको दबाबमा सरकारमा गएको केही नेताहरूको बुझाइ रहेको छ ।
यसपटक भने प्रधानमन्त्री देउवाले मत माग्ने बेलामा नै मत पनि दिनुस र सरकारमा पनि आनुस भनेको ती नेताले उल्लेख गरे ।
