कल्याण गुरुङद्वारा कांग्रेस सभापति पदमा उम्मेदवारी घोषणा

काठमाडौं । नेपाली कांग्रेसका केन्द्रीय सदस्य कल्याण गुरुङले पार्टीको सभापति पदमा उम्मेदवारी घोषणा गरेका छन् ।

आज पत्रकार सम्मेलन गरेर नेविसंघका पूर्वअध्यक्ष समेत रहेका नेता गुरुङले आसन्न १४ औ महाधिवेशनमा आफू सभापतिको उम्मेदवार हुने घोषणा गरेका हुन् । गुरुङ रामचन्द्र पौडेल समूहका हुन् ।

पत्रकार सम्मेलनमा गुरुङले नेता कार्यकर्ताको मागअनुसार उम्मेदवारी दिएको दाबी गर्दै र चाँडै आफ्नो टिम सार्वजनिक गर्ने बताएका छन् ।

महाधिवेशन नजिकिदै गर्दा कांग्रेस सभापतिमा उपसभापति विमलेन्द्र निधिले उम्मेदवारी घोषणा गरेर सम्पर्क कार्यालयसमेत खोलिसकेका छन् । महामन्त्रीमा गगन थापाले उम्मेदवारी घोषणा गरेका छन् ।

वर्तमान सभापति शेरबहादुर देउवा आफै सभापतिको दौडमा छन् । कांग्रेस केन्द्रीय महाधिवेशन ९-१३ मंसिरसम्म हुँदैछ ।