विप्लव नेतृत्व नेकपाको चेतावनी,‘एमसीसी पारित भए देशमा आन्दोलनको आगो लाग्छ’
काठमाडौं । विप्लव नेतृत्वको नेपाल कम्युनिष्टले एमसीसी पारित भए देशमा आगो लाग्ने चेतावनी दिएको छ ।
काठमाडौंमा आज पत्रकार सम्मेलन गर्दै नेकपाले राष्ट्रियतमाथि ठूलो हमला भइरहेको भन्दै एमसीसी पारित भए देशमा आगो लाग्ने चेतावनी दिएका हुन् । उनले भने,“आगो लाग्छ,आन्दोलनको आगो लागेका बेला के हुन्छ, शासकहरूले हेक्का राखुन् ।”
एमसीसीको विरोधमा देशभर विभिन्न विरोधका कार्यक्रम गर्दै आएको नेकपाले थप आन्दोलन गर्ने चेतावनी दिएको हो ।
पत्रकार सम्मेलनमा प्रवक्ता खड्कबहादुर विश्वकर्मा ‘प्रकाण्ड’ ले एमसीसी पास गर्ने मूर्खता गरिए शेरबहादुर देउवा नेतृत्वको सरकारविरुद्ध प्रतिरोध गरिने चेतावनी समेत दिए । उनले भने,“यो सरकारले एमसीसी पास गर्ने मूर्खता नगर्नु, छोटो समयको सरकार हो यो । यसअघि केपी ओलीले कोसिस त गरेका थिए तर पनि सकेनन् ।”
उनले जनताकै विरोधका कारण अहिलेसम्म एमसीसी पास हुनबाट रोकिएको दाबी गरे । प्रकाण्डले भने,“हाम्रो विरोधले चाहेर पनि शासकले यसलाई पास गर्न सकेका थिएनन् । तत्कालिन शेरबहादुर देउवा सरकारले सुरु गरेको यो सम्झौता ओलीले पनि हाउसमा टेबुल गर्न सकेनन् । यो जनताको विरोधका कारण सफल भएको हो ।”
