कोभिड पछिको वैश्विक अर्थतन्त्रका लागि अर्को ऊर्जा संकट
काठमाडौं । विश्व अर्थतन्त्रलाई ध्वस्त पारेको कोभिड–१९ वैश्विक महामारी पछि वैश्विक ऊर्जा आपूर्तिको संकट आउन लागेको विश्वका विश्लेषकहरूले चिन्ता व्यक्त गरेका छन् ।
विश्वभर ऊर्जा आपूर्तिको संकटले पेट्रोलियम पदार्थको मूल्य प्रति ब्यारल १०० अमेरिकी डलर भन्दा बढी पुग्ने र यसले वैश्विक अर्थतन्त्रमा अर्को संकट थप्ने बैंक अफ अमेरिकाले चेतावनी दिएको छ ।
यो वर्षको चिसो मौसम सुरु हुने बेला प्राकृतिक ग्यासको माग बढ्दा त्यसको भाउ बढ्ने भएको हो ।
पेट्रोलियम पदार्थको मूल्यमा हुने सम्भावित वृद्धिले उच्च स्फीतिको चाप बढाउने छ ।
ब्लुम्बर्गका विश्लेषकहरूले गरेको अध्ययनका आधारमा यो संकट विश्व अर्थतन्त्रलाई पर्ने भएको हो ।
बहुराष्ट्रिय कम्पनीहरूका अनुसार ग्यासदेखि तेलसम्म प्राकृतिक ग्यासको मूल्य रेकर्डरूपमा उच्च हुने छ । तेलको मागमा थप वृद्धि हुन गइ मूल्य वृद्धि हुने विश्लेषकहरूको कथन छ ।
चिसोको मौसमा सामान्यरूपमा हुने ऊर्जाको माग अपेक्षितरूपमा बढ्ने छ । यसै बेला अन्तर्राष्ट्रिय पर्यटन क्षेत्र विस्तारका लागि अन्तर्राष्ट्रिय हवाई क्षेत्र फेरि खुल्ने तयारी भइरहेको छ ।
अन्तर्राष्ट्रिय हवाई सेवा फेरि सुरु भए जेट इन्धनको माग बढ्ने छ । जेट इन्धनको मागले जेट इन्धनको भाउ वृद्धि गराउँछ ।
“ यी सबै तत्वहरू एकसाथ आएमा तेल मूल्यको वृद्धि गराउने र स्फीति चापको दोस्रो चरण आउने” विश्लेषकहरूले जनाएका छन् ।
यसले बृह्त अर्थतन्त्रका लागि आँधी ल्याउने छ ।
बैंक अफ अमेरिकाले कच्चा तेलको मूल्य संकटको अर्को कार्ड हुने जनाएको छ ।
