विप्लव र महरा एउटै मञ्चमा
कपिलवस्तु । नेकपा (माओवादी केन्द्र)का प्रवक्ता कृष्णबहादुर महरा र नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ सार्वजनिक रुपमा एउटै मञ्चमा देखिएका छन् ।
नेकपाले कपिलवस्तुको शिवगढीमा केन्द्रीय सदस्य चन्द्रबहादुर चन्द ‘वीरजंग’को श्रद्धाञ्जली सभामा पुगेका महरा र महासचिव विप्लव एउटै मञ्चमा देखिएका हुन् ।
नेकपा महासचिव विप्लव,सचिवालय सदस्य हेमन्त प्रकाश ओली ‘सुदर्शन‘, सन्तोष बुढासहितका नेता श्रद्धाञ्जली कार्यक्रममा पुगेका छन् । अन्य दलबाट भने उच्च तहका नेतामा पूर्वसभामुख महरा पुगेका हुन् ।
भूमिगत जीवनबाट खुल्ला भएलगत्तै विप्लवले राजनीतिक दलका नेतामध्य सबैभन्दा पहिला महरालाई नै भेटेका थिए । महरा महासचिव विप्लवका राजनीतिक गुरु पनि हुन् ।
पछिल्लो समय महराले विभाजित भएका पूर्वमाओवादी र अन्य कम्युनिष्ट पार्टीबीच एकताका लागि पहल गर्दै आएका छन् । नेकपाका केन्द्रीय सदस्य वीरजंगको गत असोज २९ गते राति उपचारका क्रममा दिल्लीमा निधन भएको थियो ।
