नेकपा महासचिव विप्लव र माओवादी केन्द्रका नेता श्रेष्ठबीच भेटवार्ता

काठमाडौं । नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ले नेकपा माओवादी केन्द्रका नेताहरूसँगको छलफल बाक्लो बनाएका छन् ।

यसअघि पटक पटक प्रवक्ता कृष्णबहादुर महरासँग छलफल गरिसकेका महासचिव विप्लवले हिजो मात्रै माओवादी केन्द्रका अध्यक्ष पुष्पकमल दाहाल ‘प्रचण्ड’ सँग छलफल गरेका थिए । प्रचण्डसँगको छलफलको अर्को दिन आज महासचिव विप्लवले श्रेष्ठसँग छलफल गरेका हुन् ।

भेटमा मुलुकको समसामयिक राजनीतिक विषयमा छलफल भएको नेकपाले जनाएको छ ।

नेकपाका अनुसार दुई नेताबीच ‘मुलुकको वर्तमान जटिल राजनीतिक अवस्थालाई निकास दिने, नेकपा र सरकारबीच भएको तीनबुँदे सहमति कार्यान्वयन गर्ने र नेकपाले अघि सारेको प्रगतिशील संयुक्त सरकार, जनमतसङ्ग्रह र वैज्ञानिक समाजवादका विषयमा छलफल भएको छ ।’