नेकपा (माओवादी केन्द्र) को प्रदेश सम्मेलन सुरु
प्रकाशित मिति : 11 December, 2021 4:12 pm
काठमाडौं । नेकपा (माओवादी केन्द्र) को प्रदेश सम्मेलन सुरु भएको छ । सात भौगोलिक र तीन गैर भौगोलिक प्रदेशमा सम्मेलन सुरु भएको हो ।
नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले भर्चुअल माध्यमबाट सम्मेलनको उद्घाटन गरेका छन् । माओवादीले सात भौगोलिकसहित उपत्यका विशेष, सम्पर्क समन्वय र प्रवास प्रदेश समिति गठन गरेको छ ।
प्रदेश नं १ को विराटनगर, प्रदेश नं २ को जनकपुर, वाग्मतीको काठमाडौं, गण्डकीको पोखरा, लुम्बिनीको भालुवाङ, कर्णालीको सुर्खेत र सुदूरपश्चिम प्रदेशको धनगढीमा सम्मेलन सुरु भएको छ ।
नेकपा माओवादी केन्द्रको राष्ट्रिय सम्मेलन आउँदो पुस ११ देखि १३ गतेसम्म राजधानीमा हुँदैछ । राष्ट्रिय सम्मेलनमार्फत माओवादीले आगामी कार्यदिशा निर्माण गर्ने बताएको छ ।
