कांग्रेस १४औँ महाधिवेशन : उम्मेदवारी फिर्ता आज बिहान ११ बजेभित्र
काठमाडौं । नेपाली कांग्रेसको १४औँ महाधिवेशन अन्तर्गत आज उम्मेदवारीहरुको नाम फिर्ता र त्यसपछि उम्मेदवारहरुको अन्तिम नामावली प्रकाशन गर्ने कार्य तालिका रहेको छ।
हिजो उम्मेदवारी दिएकाहरुले आज बिहान ११ बजेभित्र आफ्नो उम्मेदवारी फिर्ता लिन सक्नेछन्।
महाधिवेशनमा १३४ पदका लागि ५४८ जनाको उम्मेदवारी परेको छ। कांग्रेस सभापतिमा नै ६ जनाले उम्मेदवारी दिएका छन् । प्रधानमन्त्री शेरबहादुर देउवा, विमलेन्द्र निधि, प्रकाशमान सिंह र शेखर कोइरालासँगै कल्याण गुरुङ र युवराज न्यौपानेले सभापतिमा उम्मेदवारी दिएका छन्।
निर्वाचन समितिले आज मध्याह्न सवा १२ बजे उम्मेदवारको अन्तिम नामावली प्रकाशन हुने जानकारी दिएको छ। महाधिवेशनअन्तर्गत मतदान भने भोलि सोमबार बिहान ८ बजेदेखि हुने निर्वाचन अधिकृत गोपालकृष्ण घिमिरेले जानकारी दिएका छन् ।
मतदानको लागि राष्ट्रियसभा गृह, महेन्द्र पुलिस क्लब र भृकुटीमण्डपमा मतदानस्थलको व्यवस्था गरिएको छ।
