नेकपा (माओवादी केन्द्र) को पदाधिकारी सङ्ख्या १५ सदस्यीय हुने

काठमाडौं । नेकपा (माओवादी केन्द्र) को पदाधिकारी सङ्ख्या १५ सदस्यीय हुने भएको छ ।

आज बसेको केन्द्रीय कमिटी बैठकले केन्द्रीय समितिमा १५ सदस्यीय पदाधिकारी राख्ने प्रस्ताव अनुमोदन गरेको हो । प्रवक्ता कृष्णबहादुर महराले माओवादी केन्द्रको केन्द्रीय समितिमा अब १५ पदाधिकारीसहित २९९ सदस्यीय केन्द्रीय समिति निर्वाचित हुने जानकारी दिए ।

केन्द्रीय समितिको बैठकले पारित गरेको विधानअनुसार पार्टीमा एक जना अध्यक्ष, एक वरिष्ठ उपाध्यक्ष, छ जना उपाध्यक्ष, एक महासचिव, दुई उपमहासचिव, तीन सचिव र एक जना कोषाध्यक्ष रहने छन् ।

यसअघि प्रथम राष्ट्रिय सम्मेलनको नाम दिएको माओवादीले हिजो मात्रै मात्रै त्यसलाई महाधिवेशनमा रुपान्तरण गर्ने निर्णय गरेको थियो । महाधिवेशनको आज दिउँसो ३ बजे प्रज्ञा–प्रतिष्ठानमा उद्घाटन गर्ने कार्यक्रम छ ।