गुनासो…
गुनासो कोसँग गरुँ आमा ?
तिम्रो मातृत्वको….
तिम्रो ममताको…
तिम्रो अभिभावकत्वको…
तिम्रो व्यक्तित्वको …
प्रश्न उठाउने तागत छ र ममा ?
म कुन कुन प्रश्न उठाउँ …
तिम्रो सहनशीलताको …
तिम्रो धैर्यताको …
तिम्रो अग्निपरिक्षाको …
तिम्रो मौनताको ??
प्रेमको पनि पुजारी तिमी,
आदर्शको पनि आभा तिमी जात तिम्रो र मेरो उस्तै …
विवशता तिम्रो र मेरो उस्तै …
मतृत्व तिम्रो मेरो उस्तै …
तिमी नारी म पनि नारी अस्तित्वको अंश नि उस्तै …
कुन हैसियतले गुनासो गरुँ …
गुनासो गर्ने तागत छ र आमा?
तिमी सृष्टिकी पुजारी …
प्रकृतिकी सुन्दर नगरी …
कलाकी सुन्दर बिहानी …
निशाकी प्यारी सुहानी …
हजारौं हस्तिकी निशानी …
तर, आमा… प्रेम जन्माउदै गर्दा बलात्कारी कसरी जन्मायौ ?
बुद्ध जन्माउदै गर्दा दुष्ट कसरी जन्मायौ ?
राम जन्मिदा रावण किन जन्मायौ ?
देवता जन्मिँदा राक्षस किन जन्मायौ ?
कोसँग गरुँ आमा … गुनासो ?
प्रश्न गर्ने अधिकार छ नि हैन आमा ?
गुनासो पोख्ने हिम्मत दियकी छौ नि हैन आमा ?
त्यसैले त यो छोरीहरू जागेको बेला हो …
चिसो आँखाले आँसु बोलेको बेला हो …
तर ,आमा तिम्रो मौन चित्कारले मलाई झस्काउँछ…
तिम्रो शून्य आँखाले मलाई तर्साउँछ…
म प्रश्न तेर्स्याउँला ,तर तिमी आफ्नै कोखलाई …
खै कसरी प्रश्न गर्छेउ ?……
तिमी कस्लाई गुनासो गर्छेउ ? आमा….
सुलक्षणा भट्टराई (शिखा ) काठमाडौं
