सोमबार १५ अंकले घट्यो नेप्से, कारोबार रकम १ अर्ब मुनि
काठमाडौं । साताको पहिलो कारोबारको दिन सेयर बजार दोहोरो अंकले घटेको छ । सोमबार नेप्से परिसूचक १५ अंकले घटेको छ भने कारोबार रकम पनि १ अर्ब मुनि खुम्चिएको छ ।
नेपाल स्टक एक्सचेञ्जका अनुसार आज (सोमबार) सेयर कारोबार मापक नेप्से परिसूचक १५.८२ अंकले घटेर २०३२.३४ अंकमा झरेको छ । यस्तै, सेन्सेटिभ परिसूचक पनि २.२७ अंकले घटेर ३८९.९८ अंकमा झरेको छ ।
आज नेप्सेमा कारोबार भएका कूल १३ उपसमूहमध्ये आज सबै उपसमूहको सेयर घटेको छ ।
सोमबार कारोबार रकमका आधारमा सानिमा बैंक लिमिटेडको सर्वाधिक कारोबार भएको छ । बैंकको ९ करोड १६ लाख १ हजार ५७४ रूपैयाँ बराबरको कारोबार भएको हो ।
बलेफी हाइड्रोपावर र ग्रीन भेन्चर्स लिमिटेडका लगानीकर्ताले सबैभन्दा धेरै कमाएका छन् । यी वटै कम्पनीको सेयरमूल्य क्रमश ९.९९ र ९.९८ प्रतिशतले बढेर सकारात्मक सर्किट लागेको हो ।
त्यस्तै आज दिन मानुषीलघुवित्त वित्तीय संस्था लिमिटेडका लगानीकर्ताले सबैभन्दा धेरै गुमाएका छन् । संस्थाको सेयरमूल्य ५.४० प्रतिशतले घटेको छ ।
कूल २३० वटा कम्पनीको २९ लाख २० हजार ७०५ कित्ता सेयर खरिदबिक्री हुँदा ९९ करोड ८६ लाख ७४ हजार २६२ रूपैयाँ बराबरको कारोबार भएको नेप्सेले जनाएको छ ।
