नेप्से ११ अंकले घट्दा खुम्चियो कारोबार रकम
काठमाडौं । सेयरबजारको ओरालो यात्राले आजपनि निरन्तरता पाएको छ । मंगलबार नेप्से परिसूचक दोहोरो अंकले घटेको छ भने कारोबार रकम पनि खुम्चिएको छ ।
नेपाल स्टक एक्सचेञ्जका अनुसार आज सेयर कारोबार मापक नेप्से परिसूचक ११.८२ अंकले घटेर १९२१.३१ अंकमा झरेको छ यस्तै, सेन्सेटिभ परिसूचक पनि ३.२२ अंकले घटेर ३७२.६० अंकमा झरेको छ ।
नेप्सेमा कारोबार भएका १३ उपसमूहमध्ये २ वटा उपसमुहको सेयर बढेको छ भने बाँकी ११ वटा उपसमुहको सेयर घटेको छ ।
मंगलबार कारोबार रकमका आधारमा एशियन लाइफ इन्स्योरेन्स कम्पनी लिमिटेडको सर्वाधिक कारोबार भएको छ ।
कम्पनीको ७ करोड ३१ लाख ३३ हजार रूपैयाँ बराबरको कारोबार भएको हो ।
आजको दिन सीवाइसी नेपाल लघुवित्त वित्तीय संस्था लिमिटेडका लगानीकर्ताले सबैभन्दा धेरै कमाएका छन् ।
कम्पनीको सेयरमूल्य ९.९९ प्रतिशतले बढेर सकरात्मक सर्किट लागेको छ भने लक्ष्मी इक्विटी फण्डका लगानीकर्ताले आज सबैभन्दा धेरै गुमाएका छन् उक्त फण्डको मूल्य ५.७३ प्रतिशतले घटेको छ ।
कूल २३० वटा कम्पनीको ३० लाख ३७ हजार ६ सय ३० कित्ता सेयर खरिदबिक्री हुँदा एक अर्ब ५ करोड ८२ लाख ४६ हजार ४ सय ७२ रूपैयाँ बराबरको कारोबार भएको नेप्सेले जनाएको छ ।
