सहकारीकाे लागि ‘कोप कार्ड’ शुरू, ग्लाेबल आइएमई बैंककाे एटीएमबाट रकम निकाल्दा शुल्क नलाग्ने
काठमाडाैं। ग्लोबल आइएमई बैंक लिमिटेडले राष्ट्रिय सहकारी बैंक लिमिटेड र स्मार्टच्वाइस टेक्नोलोजिज लिमिटेडसँगको सहकार्यमा सहकारीहरुको लागि ‘कोप कार्ड’को सेवा शुभारम्भ गरेको छ ।
काठमाडौंमा आयोजित एक कार्यक्रममा भूमि व्यवस्था, सहकारी तथा गरिबी निवारण मन्त्री शशी श्रेष्ठले सहकारीहरुको लागि सहकारी पहिचान सहितको ‘कोप कार्ड’को शुरू गरिन्।
कार्ड अन्तर्राष्ट्रिय स्तरको चिप कार्ड र कन्टाक्टलेश प्रबिधिमा आधारित हुनेछ भने नेपाल र भारतका एटीएम तथा पीओएस मार्फत जुनसुकै स्थानबाट सहजै चलाउन सकिने बैंकले जनाएकाे छ । कार्ड ग्लोबल आइएमई बैंकको प्रायोजनमा राष्ट्रिय सहकारी बैंक मार्फत् सहकारीहरुले जारी गर्नेछन् ।
याे सहकार्यपश्चात् मुलुकभरका करीब ३३ हजार सहकारीहरुले सजिलै राष्ट्रिय सहकारी बैंक लिमिटेडमा सम्पर्क गरी कोप कार्ड जारी गर्न सक्नेछन् ।
वित्तीय सेवा चौबिसै घण्टा उपलब्ध हुने जनाइएकाे छ । कोप कार्ड प्रयोग गर्ने ग्राहकहरुले ग्लोबल आइएमई बैंकको २६६ एटीएमबाट रकम निकाल्दा कुनै शुल्क नलाग्ने भएकाे छ ।
सहकारीहरुले आफनो सदस्यहरुलाई कोप कार्डको वितरण गरेपछि सहकारीमा आबद्ध सदस्यहरुले आफ्नो सहकारीको खाताबाट जुनसुकै बेला जहाँबाट पनि एटीएमबाट रकम निकाल्न सक्नेछन भने पीओएसको माध्यमबाट कुनै पनि सेवा वा वस्तु खरिद गरी भुक्तानी गर्न सक्नेछन ।
यसले सहकारी सदस्यहरुको सहकारी प्रतिको विश्वास बढ्दै जाने, नगद कारोबार कम भएर औपचारिक रुपमा बचत परिचालन हुने विश्वास लिएकाे बैंकले जनाएकाे छ ।
