रुपन्देहीमा गोली लागेर एक युवक घाइते

रुपन्देही । रुपन्देहीको ओमसतिया–४ स्थित वसन्तपुरमा गोली चलेको छ । अज्ञात समूहको गोली प्रहारबाट एक जना युवा गम्भीर घाइते भएका छन् । घाइते हुनेमा ३१ वर्षका विकास गुरुङ भएको रुपन्देहीका एसपी रवीन्द्र रेग्मीले बताए ।

आइतबार राति करिब ११ बजेतिर बसन्तपुर वडा कार्यालय अगाडि गुरुङसँग जम्का भेट भएपछि उक्त समूहले गोली प्रहार गरेको प्रहरीले जनाएको छ ।

गुरुङको बायाँ कोखामा गोली लागेको र उनको युनिभर्सल मेडिकल कलेज भैरहवामा उपचार भइरहेको प्रहरीले जनाएको छ।

तीन वटा मोटरसाइकलमा आएका सो समुहले गोली प्रहार पश्चात एक होटलबाट २५ हजार रुपैयाँ लुटपाट समेत गरेको प्रारम्भरिक अनुसन्धानबाट खुलेको एसपी रेग्मीले बताए ।