मोरङमा २ पेस्तोलसहित २ जना प्रकाउ
मोरङ । सशस्त्र प्रहरी बल टोलीले मोरङमा पेस्तोलसहित २ जनालाई प्रकाउ गरेको छ । भारतबाट बेच्न भनेर नेपाल ल्याइएका पेस्तोल र रिभल्बरसहित एक जना र उक्त हतियार किन्न खोज्ने अर्का एक जना गरी २ जनालाई सशस्त्र प्रहरी टोलीले पक्राउ गरेको हो।
पक्राउ पर्नेहरुमा सुनवर्षी नगरपालिका–८ का २८ वर्षीय आरिफ आलम र उर्लाबारी नगरपालिका–६ बस्ने २९ वर्षीय नविन धिमाल रहेका छन् ।
सशस्त्र प्रहरी निरीक्षक नम प्रभाव राई नेतृत्वको टोलीले आइतबार साँझ ५ बजे भारतबाट नेपालतर्फ आइरहेको मोटरसाइकलमा सवार आलमलाई शंका लागेर खानतलासी गर्दा अटोमेटिक चाइनिज पेस्तोल र रिभल्बर सिक्सर एक–एक थान बरामद भएको थियो ।
प्रकाउ परेका आलमसँग सोधपुछका क्रममा उक्त पेस्तोल उर्लावारी नगरपालिका ६ बस्ने नविन धिमालले भारतबाट मगाएको बताएपछि प्रकाउ गरिएको सशस्त्र प्रहरीले जानकारी दिएको छ । उनीहरुलाई हतियारसहित पक्राउ गरी रंगेली प्रहरीमा बुझाएको छ ।
