स्याङ्जामा जनतासँग काङ्ग्रेस अभियान सुरु
स्याङ्जा । नेपाली काङ्ग्रेस स्याङ्जाले जनतासँग काङ्ग्रेस अभियानको शुभारम्भ गरेको छ । आगामी मंसिर ४ को निर्वाचनलाई लक्षित गरेर उक्त अभियानको समुद्घाटन गरिएको छ ।
स्याङ्जाका ११ वटै पालिका र ९७ वडामा चुनाव लक्षित कार्यक्रमका साथ जनताका बिच जाने स्याङ्जा काङ्ग्रेसले जनाएको छ ।
उक्त समुद्घाटन समारोहमा बोल्दै नेपाली काङ्ग्रेसका उपसभापति धनराज गुरुङले काङ्ग्रेस पदमा अल्झिएर नबसी ठुलो लक्ष्यका साथ जनताको घरदैलोमा जानुपर्ने भन्दै काङ्ग्रेस के हो भनेर जनतालाई बुझाउनुपर्ने बताएका थिए ।
उक्त कार्यक्रममा नेपाली काङ्ग्रेस स्याङ्जाका सभापति राजु थापाले स्याङ्जामा काङ्ग्रेस एकताबद्ध रहेको र निर्वाचनमा काङ्ग्रेसले विजय प्राप्त गर्ने बताए ।
हरितालिका तीजको अवसर पारेर आयोजना गरिएको उक्त कार्यक्रममा स्याङ्जा जिल्लाभरका काङ्ग्रेससँग आबद्ध महिला चेलीबेटीहरुलाई दर खुवाउनुका साथै शुभकामना आदानप्रदान गरिएको थियो ।
