नेप्सेको ओरालो यात्रा कायमै, कारोबार रकम ८२ करोडमा झर्यो
काठमाडौं । साताको कारोबारको चौथो दिन पनि सेयरबजारको ओरालो यात्रा कायमै रहेको छ । बुधबार नेप्से परिसूचक ११ अंकले घट्दा कारोबार रकम भने ८२ करोडमा झरेको छ ।
नेपाल स्टक एक्सचेञ्जका अनुसार आज (बुधबार) सेयर कारोबार मापक नेप्से परिसूचक ११.९७ अंकले घटेर १९३९.८८ अंकमा झरेको छ । यता सेन्सेटिभ परिसूचक पनि १.७० अंकले घटेर ३७७.३८ अंकमा झरेको छ ।
नेप्सेमा आज कारोबार भएका कूल १३ उपसमूहमध्ये आज म्युचुअल फण्डबाहेक बाँकी सबै वटा उपसमूहको सेयर घटेको छ ।
बुधबार कारोबार रकमका आधारमा नेपाल टेलिकमले अग्रस्थानमा रहेको छ । टेलिकमको ५ करोड १५ लाख ६० हजार रूपैयाँ बराबरको कारोबार भएको छ ।
आज सनराइज फर्स्ट म्युचुअल फण्डका लागनीकर्ताले सबैभन्दा धेरै कमाएका छन् । उक्त फण्डको मूल्य ७.७२ प्रतिशतले बढेको छ ।
यस दिन १० प्रतिशत प्राइम डिबेञ्चर, २०८८ को मूल्य सबैभन्दा धेरै घटेको छ । उक्त डिबेञ्चरको मूल्य ५.८८ प्रतिशतले घटेको छ ।
कूल २२४ वटा कम्पनीको २९ लाख ४३ हजार ७ सय ६९ कित्ता सेयर किनबेच हुँदा ८२ करोड ६२ लाख ३० हजार ५ सय ८३ रूपैयाँ बराबरको कारोबार भएको नेप्सेले जनाएको छ ।
