सशस्त्र प्रहरी सवार मोटरसाइकल दुर्घटना हुँदा २ को मृत्यु
दाङ । पूर्वपश्चिम राजमार्गअन्तर्गत दाङको देउखुरीमा मोटरसाइकल दुर्घटना हुँदा दुई सशस्त्र प्रहरीको मृत्यु भएको छ ।
राप्ती गाउँपालिका ३ मुसरियामा शुक्रबार राति लु ४० प ४९२२ नम्बरको मोटरसाइकल अनियन्त्रित भइ दुर्घटना हुँदा मोटरसाइकलमा सवार सशस्त्र प्रहरी बल ज्वालामाई गण भालुवाङमा कार्यरत दुई सशस्त्र प्रहरीको मृत्यु भएको हो ।
मृत्यु हुनेमा राप्ती गाउँपालिका वडा नम्बर ६ लठवाका ३६ वर्षीय सुलेश चौधरी र लमही नगरपालिका वडा नम्बर १ का ३५ बर्षीय लाहानु चौधरी रहेका छन् । दुर्घटनामा परी लहानुको घटनास्थलमै र सुलेशको उपचारका लागि कोहलपुर लैजाने क्रममा मृत्यु भएको प्रहरीले जनाएको छ ।
सुलेश सशस्त्र प्रहरी हवल्दार हुन् भने लाहानु सशस्त्र प्रहरी सहायक हवल्दार हुन्।
लगातारको वर्षाका कारण देउखुरीका विभिन्न ठाउँमा उद्धारमा खटिएको र डिउटी सकाएर गणमा फर्किने क्रममा दुर्घटनामा परेको बल ज्वालामाई गणले जनाएको छ । घटनाबारे थप अनुसन्धान भइरहेकोे बताइएको छ ।
