बाजुरा झडपमा घाइते भएका अनेरास्ववियु नेता ऐडीको मृत्यु

बाजुरा । बाजुरामा दुई समूहबीच भएको झडपमा घाइते भएका त्रिवेणी नगरपालिका ७ बस्ने अनेरास्ववियुका केन्द्रीय सदस्य चेतन ऐडीको मृत्यु भएको छ ।

गम्भीर घाइते भएका ऐडीको उपचारका क्रममा बयलपाटा अस्पतालमा मृत्यु भएको प्रहरीले जनाएको छ ।

आइतबार दुई समूहबीच भएको झडपमा प्रहरीले बल प्रयोग गर्दा सुरेन्द्र ऐडी (संजिव) को मृत्यु भएको थियो । सो झडपमा परेर प्रहरी सहायक हवल्दार कृष्ण बहादुर कुँवरसहित ३ जना घाइते भएका थिए ।

झडपको क्रममा प्रहरीसँग भएको इन्सास राइफल खोसेर झडप गर्नेमध्ये केही भागेका छन् । राइफल अझै फेला नपरेको प्रहरीले बताएको छ । आन्दोलनकारीले राइफल खोसेर भागेपछि प्रहरीले गोली चलाएको थियो ।