पोखरामा कोरोना संक्रमित व्यक्ति नभएको पुष्टि, केन्द्र र प्रदेशबीच तालमेल नमिल्दा गलत सूचना बाहिरियो
काठमाडाैं, २१ चैत ।
स्वास्थ्य तथा जनसंख्या मन्त्रालयले पोखरामा कोरोना भाइरसको संक्रमित व्यक्ति नभेटिएको पुष्टि गरेको छ ।
यसअघि पोखरा स्वास्थ्य विज्ञान प्रतिष्ठानको प्रयोगशालामा परीक्षण गरिएको नमुनामा संक्रमित व्यक्ति भेटिएको समाचार सार्वजनिक भएको थियो । तर,स्वास्थ्य मन्त्रालयका प्रवक्ता डा. विकास देवकोटाले प्रष्ट नभनेपनि पोखरामा पोजेटिभ भेटिएको केश काठमाण्डौंमा नेगेटिभ भएको घुमाउरो ढंगले उल्लेख गरेका छन् ।
उनको भनाईमा पोखरामा स्थापना भएको प्रयोगशाला अझै पूर्ण भईसकेको छैन । उनले भने,‘हालसम्म पोखराको कुनैपनि पोजेटिभ केश छैन । यो अलिकति के हुँदो रहेछ भन्दा अहिले हामीले प्रदेशमा विस्तार गरेयौं । त्यसमा मेसिनहरु गएको छ । रि-एजेन्टहरु गएको छ । त्यो मेसिनको भ्यालिडिएशनको कुराहरु आउँछ । केही कुराहरु प्रष्ट रुपमा गर्नुपर्ने हुन्छ ।’
उनले सुरुमा प्रयोगशाला ठिक छ की छैन भनेर स्थापना गरिएको नयाँ प्रयोगशाला र राष्ट्रिय जनस्वास्थ्य प्रयोगशालामा दाहोरो परीक्षण हुने स्पष्ट पारे । उनले भने,‘प्रदेशमा पनि परीक्षण हुने अनि केन्द्रमा पनि हुँने भनेर दोहोरो भयो भन्नेकुरा पनि उठ्यो त्यो होईन । सुरुमा प्रमाणिकरणका लागि त कुनै शंका लागेको केश जाँच गरिन्छ नै ।’
कास्कीमा भारतबाट आएका व्यक्तिमा कोरोनाको संक्रमण पुष्टि भएको समाचार गण्डकी प्रदेश सरकार र प्रयोगशाला स्रोतबाटै बाहिरिएको थियो । गण्डकी प्रदेश सरकार आधिकारिक वेभसाईटमा कोराना भाइरसबारेको तथ्याङ्कमा स्वास्थ्य तथा जनसंख्या मन्त्रालयको नियमित पत्रकार सम्मेलन सकिएपछि पनि संक्रमितको संख्या ७ उल्लेख छ, जुन पछि हटाइएको छ ।
गण्डकी प्रदेशका आर्थिक मामिला तथा योजना मन्त्री किरण गुरुङले पनि केन्द्रले घोषणा गर्ने नै आधिकारिक हुने उल्लेख गरेका छन् । उनले आफ्नो फेसबुकमा लेखेका छन्,‘ मिडियाका साथीहरुलाई हतार नगर्न र जे हो त्यही समाचार सम्प्रेशण गर्न अनुरोध छ । कास्कीमा कोरोना संक्रमितको अहिलेसम्म पुष्टि भइसकेको छैन । पोखरामा परीक्षण भएका सबै परीक्षणको केन्द्रीय प्रयोगशालाले पुष्टि गरेपछि मात्र केन्द्रीय प्रवक्ताबाट घोषणा हुने छ ।’ यसले गण्डकी प्रदेश सरकार, प्रदेशस्तरीय प्रयोगशाला र केन्द्रबीच तालमेल नमिल्दा गलत जानकारी बाहिरिएको देखिएको छ ।
