सन्धिखर्कको कुडुले फाँटमा माघ ११ गतेदेखि पाँचौँ अर्घाखाँची महोत्सव हुने
अर्घाखाँची । अर्घाखाँची जिल्लामा पाँचौँ अर्घाखाँची महोत्सव एवं कृषि, पर्यटन तथा औधोगीक प्रदर्शनी २०७९ हुने भएको छ ।
माघ ११ गतेदेखि पाँचौँ महोत्सव हुन लागेको उद्योग वाणिज्य संघ र चेम्बर अफ कमर्सले पत्रकार सम्मेलन मार्फत जनाएको हो।
माघ ११ गतेदेखि माघ २३ गतेसम्म सन्धिखर्कको कुडुले फाँटमा महोत्सव लाग्ने उद्योग वाणिज्य संघ अर्घाखाँचीका अध्यक्ष प्रदीप मिश्रले जानकारी दिए ।
मिश्रले अर्घाखाँची मात्रै नभइ देशकै ऐतिहासिक महोत्सव हुन लागेको बताए । उनले हालसम्म उद्योग वाणिज्य संघ र चेम्बर अफ कमर्सको संयुक्त आयोजनामा हालसम्म कुनै कार्यक्रम नभएको बताएका थिए ।
त्यस्तै मिश्रले लामो समय बन्द भएका व्यापार व्यवसायलाई महोत्सवले राहत महशुस गराउने बताए । पाँचौँ अर्घाखाँची महोत्सवमा अर्घाखाँचीमा उत्पादन भएका कृषिजन्य बस्तु, अर्घाखाँचीका धार्मिक स्थल तथा पर्यटकीय स्थलहरू, स्थानीय नृत्य तथा कलाहरू जस्तैः भैरव नृत्य, भैली नृत्य, सोराय नृत्यहरू प्रमुख आकर्षक भएका उद्योग वाणिज्य संघ अर्घाखाँचीले जनाएको छ ।
महोत्सवमा अपांग तथा बृद्धबृद्धाका लागि निःशुल्क टिकट रहेको पनि जनाएको छ । पत्रकार सम्मेलन उद्योग वाणिज्य संघ अर्घाखाँचीका अध्यक्ष प्रदीप मिश्रको अध्यक्षता र चेम्बर अफ कमर्सका प्रवक्ता हरिप्रसाद भुसालको संचालनमा सम्पन्न भएको थियो ।
