पाल्पामा ट्याक्टर दुर्घटना हुँदा एक जनाको मृत्यु, चार घाइते
काठमाडौँ । पाल्पाको रम्भा गाउँपालिकामा आइतबार राति ट्याक्टर दुर्घटना हुँदा एक जनाको मृत्यु भएको छ भने चार घाइते भएका छन् ।
मृत्यु हुनेमा रम्भा गाउँपालिका १ हुँगी बस्ने १७ वर्षीय विशाल थापा रहेको जिल्ला प्रहरी कार्यालय पाल्पाका प्रवक्ता एवं सूचना अधिकारी प्रहरी नायव उपरीक्षक वीरेन्द्र थापाले जानकारी दिए ।
ट्याक्टर दुर्घटना परी घाइते हुनेमा रम्भा गाउँपालिका १ हुँगी बस्ने १९ वर्षी बिवेका थापा, पूर्णबहादुर बोट, रामपुर नगरपालिका १ असर्दी बस्ने २४ वर्षीय दिलबहादुर घर्ती र १६ वर्षीय युवराज घर्ती रहेका छन् ।
रामपुर नगरपालिका १ असर्दी बस्ने युवराज घर्तीको मिशन अस्पतालमा उपचार भइरहेको छ भने बाँकी तीन जना सामान्य उपचारपछि डिस्चार्ज भइसकेको प्रहरीले बताएको छ ।
रम्भा गाउँपालिका ३ निकिचौरस्थित कालीगण्डकी करिडोर सडक खण्डमा पिपलडाँडाबाट हुँगी जाँदै गरेको लु ४ ७९१६ नम्बरको ट्याक्टर दुर्घटना भएको हो ।
ट्याक्टर दुर्घटना परी घाइते भएका थापाको उपचारको क्रममा लुम्बिनी मेडिकल कलेज प्रभासमा मृत्यु भएको हो । ट्याक्टर आफै अनियन्त्रित भई सडकबाट अन्दाजी १५ मिटर तल खसेको प्रहरीले जनाएको छ ।
ट्याक्टर चालक फरार रहेको र खोजी कार्य भइरहेको जिल्ला प्रहरी कार्यालय पाल्पाले जनाएको छ ।
