यो वर्षको यदु स्मृति पत्रकारिता पुरस्कार चौधरीलाई
काठमाडौँ। गोरखापत्रमा कार्यरत पत्रकार लक्की चौधरी (लोकबहादुर चौधरी) ले यो वर्षको यदि स्मृति पत्रकारिता पुरस्कार पाउने भएका छन्।
यदु स्मृति पत्रकारिता पुरस्कार सिफारिस समितिले २०७९ सालको पुरस्कार कैलालीबाट पत्रकारिता थालनी गरेर राष्ट्रिय रूपमा स्थापित पत्रकार चौधरीलाई प्रदान गर्न सिफारिस गरेको संयोजक सूर्य थापाले जानकारी दिए।
वि.सं. २०५३ सालदेखि पत्रकारितामा संलग्न चौधरी कार्यक्षेत्रबाट बिस्थापित भइकन पनि निरन्तर पेशामा सक्रिय रहेकोमा उच्च कदर गरी पुरस्कार दिन सिफारिस गरिएको थापाले बताए।
सिफारिस समितिका संयोजक सूर्य थापाको अध्यक्षतामा सदस्य तीर्था गौतम र सदस्य सचिव रूद्र खड्का उपस्थित बैठकले पुरस्कारको राशीसमेत बृद्धि गरी २० हजार रूपियाँ पु-याउन सिफारिस गरेको छ।
गत वर्षको पुरस्कार पत्रकार महेश केसीलाई प्रदान गरिएको थियो। यदु स्मृति प्रतिष्ठानले विगत २१ वर्षदेखि हरेक वर्ष क्रियाशील पत्रकारहरुलाई सम्मान गरिरहेको छ ।
नेकपा एमालेका तत्कालीन जिल्ला सचिव यदु गौतमको २०५५ फागुन २१ मा तत्कालीन विद्रोही माओवादीले हत्या गरेका थिए।
