भारतलाई पराजित गर्दै नेपाली टोली फाइनलमा
काठमाडौं । भारतलाई पराजित गर्दै नेपाली टोली साफ यू २० महिला फुटबल च्याम्पियनसिपको फाइनलमा पुगेको छ।
ढाकास्थित बीएसएसएस मोस्ताफा कमल स्टेडियममा मंगलबार भएको लिग चरणको आफ्नो अन्तिम खेलमा नेपालले उत्कृष्ट प्रदर्शन गर्दै भारतलाई पराजित गरेको हो । पहिलो हाफमा एक गोलले पछि परेको नेपालले दोस्रो हाफमा पुनरागमन गर्दै तीन गोल गर्यो ।
नेपालका लागि अञ्जली चन्दले ४८, प्रीति राईले ६९ र अमिशा कार्कीले ८९औँ मिनेटमा गोल गरे। भारतका लागि अपूर्णा नर्जरीले २१औँ मिनेटमा एक मात्र गोल गरेकी थिइन्।
फाइनल खेल्ने अर्को टोलीको टुङ्गो भने दोस्रो खेलपछि हुनेछ। आजै हुने दोस्रो खेलमा बंगलादेश र भुटान खेल्नेछन्। खेलको पहिलो हाफमा १–० ले पछि परेको नेपालले दोस्रो हाफमा उत्कृष्ट पुनरागमन गर्दै जित निकालेको हो।
नेपाल पहिलो खेलमा बंगलादेशसँग ३–१ ले पराजित भएको थियो भने दोस्रो खेलमा भुटानलाई ४–० ले हराएको थियो।
