वालिङमा ट्याक्टर दुर्घटना हुँदा दुई जनाको मृत्यु
प्रकाशित मिति : 20 February, 2023 11:32 am
स्याङ्जा । स्याङ्जाको वालिङ नगरपालिकामा ट्याक्टर दुर्घटना हुँदा दुई जनाको मृत्यु भएको छ ।
मृत्यु हुनेमा चापाकोट नगरपालिका वडा नम्बर २ धुर्कोट बस्ने ३२ वर्षीय नविन सुनार र वालिङ नगरपालिका वडा नम्बर ८ मिर्दि बस्ने अन्दाजी १४ वर्षीय सोविन विक रहेको जिल्ला प्रहरी कार्यालय स्याङ्जाले जनाएको छ ।
वालिङ नगरपालिका वडा नम्बर ६ आम्डाली स्थित भित्री सडक खण्डमा जगत भङ्जयाङबाट मिर्दि तर्फ ढुङगा लिएर आउँदै गरेको ग १ त ६८८६ को नम्बरको ट्याक्टर आइतबार राति ८ बजे अनियन्त्रित भई दुर्घटना हुँदा दुई जनाको मृत्यु भएको हो ।
प्रहरीले घटनाको सम्बन्धमा थप अनुसन्धान गरिरहेको जनाएको छ ।
