प्यूठानमा आरडिटी मार्फत कोरोना परीक्षण गरिएका २७ जनाको नतिजा नेगेटिभ
![](https://i0.wp.com/www.lumbinisanchar.com/wp-content/uploads/2020/04/kit.jpg?fit=403%2C226&ssl=1)
![](https://i0.wp.com/www.lumbinisanchar.com/wp-content/uploads/2020/04/parichan-1.jpg?resize=720%2C540&ssl=1)
प्यूठान,२९ चैत ।
प्यूठानमा र्यापिड डायग्नोष्टिक टेष्ट (आरडिटी) किट मार्फत आज १६ जनाको कोरोना भाइरस संक्रमणको परीक्षण गरिएको छ ।
स्वास्थ्य कार्यालय प्यूठानका अनुसार आरडिटी मार्फत परीक्षण सुरु भएसँगै आज ऐरावती गाँउपालिकाको क्वारेन्टाइन स्थल रहेको मोती मा.वि. बिरोला केन्द्रमा रहेका १६ जनाको परीक्षण गरिएको थियो ।
परीक्षणका क्रममा सबैको नतिजा नेगेटिभ आएको स्वास्थ्य कार्यालयको भनाई छ । भोली स्वर्गद्धारी नगरपालिकाको वडानम्बर-२ को क्वारेन्टाइन रहेको स्वर्गद्धारी अढेबास स्कूलमा परीक्षण हुने छ ।
हिजो मात्रै स्वर्गद्वारी नगरपालिका वडा नम्बर-६ मा बिदेशबाट आइ क्वारेन्टाइनमा बसेका ११ जनाको परीक्षण गरिएको थियो । परीक्षणबाट सबको रिपोर्ट नेगेटिभ आएको थियो । परीक्षणपछि सबैलाई होम क्वारेन्टाइनमा बस्ने गरि घर घरमा पठाइएको छ ।
सरकारले कोरोना रोकथाम तथा नियन्त्रणका लागि देशैभर र्यापिड डायग्नोष्टिक टेष्ट सुरु गरेको छ ।
सातै प्रदेशमा ५-५हजार किट पठाएर परीक्षण सुरु गरेको हो ।
क्वारेन्टाइनमा १४ दिन बसाई अबधि पुगेका ब्यक्तिको परीक्षण गरेपछि नतिजा नेगेटिभ आए एक हप्ता होम क्वारेन्टाइनमा बस्ने गरि पठाईने छ भने पोजिटिभ नतिजा आएमा भने क्वारेन्टाइनमा राखी पुनः पिसिआर प्रविधिबाट यकिन गर्न जाँचका लागि प्रदेश जनस्वास्थ्य प्रयोगशाला भैरहवा पठाइने छ ।