संस्थापक गुप्ताको सम्झनामा रमेश कर्पले मनायो स्थापना दिवस
काठमाडाैँ । रमेश कर्पोरेशनले आफ्नो तेस्रो संस्थापक दिवस कार्यक्रम अनाथालयमा मनाएको छ । विगतमा आन्तरिक कर्पोरेट कार्यक्रमहरूको साथ १८ मार्चमा मनाउँदै आएकाे संस्थापक दिवस यस वर्ष काठमाडौँको नक्सालस्थित बालमन्दिर अनाथालयमा कर्पोरेट सामाजिक उत्तरदायित्व कार्यक्रम आयोजना गरी मनाएको हो ।
समाजको लागि पूनः योगदानमा बलियो दृष्टिकोण राख्ने रमेश कर्पोरेशनका संस्थापक रमेश गुप्ताको सम्झनामा उक्त कार्यक्रम आयोजना गरिएको थियो ।
कार्यक्रममा ‘रमेश कर्प’ का सदस्यरूले अनाथालयमा विभिन्न गतिविधिहरूको आयोजना गरी बालबालिकालाई स्टेशनरी जस्ता आवश्यक सामाग्री वितरण गरेका थिए । रमेश कर्पको यो कार्यक्रमले सामाजिक उत्तरदायित्वप्रति कम्पनीको प्रतिबद्धताले समाजमा सकारात्मक प्रभाव पार्ने आफ्नो मूल्यमान्यता र समर्पणलाई झल्काउँने आयाेजकले जनाएकाे छ ।
कार्यक्रममा रमेश कर्पोरेशनका उपाध्यक्ष रोहित गुप्ताले बालमन्दिर अनाथालयका बालबालिकाहरूसँग समय बिताउँदा हर्षित भएको बताएका हुन् । उनका अनुसार अगामी दिनहरू समाज विकासको लागि उक्त संस्थाले काम गर्नेछ ।
