शैक्षिक गुणस्तर सुधारका लागि सरोकारवाला गम्भीर हुनुपर्छ : मन्त्री शर्मा

काठमाडौँ । सञ्चार तथा सूचना प्रविधिमन्त्री एवं नेपाल सरकारका प्रवक्ता रेखा शर्माले शैक्षिक गुणस्तर सुधारका लागि सबै सरोकारवालाहरू गम्भीर भएर लाग्नुपर्ने बताएकी छन् ।

ललितपुरको गोदावरी नगरपालिका वडा नम्बर १४ ठैवस्थित फूल्चोकी माध्यामिक विद्यालयको ६४ औं स्थापना दिवसलाई सम्वोधन गर्दै उनले कति विद्यार्थीले कुन तह उत्तीर्ण गरे भन्दा पनि कति विद्यार्थीले शिक्षालाई जीवन र व्यवहारसँग जोडेर आफूलाई आत्मनिर्भर बनाउन सके भन्नेतिर प्रतिष्पर्धा हुनुपर्ने बताएकी हुन् ।

‘नेपालमा सामुदायिक विद्यालयको शैक्षिक गुणस्तर कमजोर छ भन्ने आम मान्यताजस्तो बन्न पुगेको छ, यो मान्यतालाई बदल्नुपर्छ’, उनले भनिन् ‘कुनै बेला सामुदायिक विद्यालयमा दुःखी गरिबका छोराछोरीले मात्र पढ्छन् भनेर हेपिएको थियो तर विस्तारै सामुदायिक विद्यालयप्रति आकर्षण बढिरहेको छ, यसलाई अझै बढाउँदै लैजानुपर्छ ।’

पछिल्लो समय समाजमा फेरिएको चेतनासँगै सामुदायिक विद्यालय राम्रा बनाउने र आफ्ना छोराछोरी त्यसमै पढाउने प्रचलन विकास हुँदै जानु सकारात्मक भएको उल्लेख गर्दै उनले समाजका अगुवाहरूले यसमा अझै मेहनत गर्न आवश्यक रहेका बताइन् ।

‘हामीले संविधानमै विद्यालय शिक्षाको जिम्मा स्थानीय तहलाई दिएका छौं तर यसले केही अवसर र चुनौती दुुबै सिर्जना गरेको छ’ शर्माले भनिन् ‘जुन पालिकाका जनप्रतिनिधि भिजनसहित आएका छन्, उनीहरूले विद्यालय शिक्षाको शैक्षिक गुणस्तर राम्रो बनाएका छन् भने केहीमा अझ बिग्रेको गुनासो पनि अभिभावकहरूले गरिरहेका छन् । सबै स्थानीय तहका जनप्रतिनिधिले शैक्षिक गुणस्तर सुधारका लागि प्रभावकारी योजना बनाउनु आवश्यक छ ।’

विद्यालय तहका विद्यार्थीहरूमा सूचना प्रविधिको दुरुपयोग बढ्ने खतरा पनि उत्तिकै रहेकाले यसतर्फ सचेत हुन पनि उनले सबैलाई आग्रह गरिन् । उनले भनिन्, “अहिले धेरै बालबालिका सूचना प्रविधिको लतमा लागेर पठनपाठनतिर ध्यान नदिने अवस्था पनि बनेको छ’। त्यसका साथै सूचना प्रविधिलाई सही रुपमा प्रयोग नगर्दा हिंसाका घटना पनि बढेका छन्, यसतर्फ पनि शैक्षिक संस्था, शिक्षक, विद्यार्थी र अभिभावक सेचत हुनु आवश्यक छ ।”

बामपंथी नेता दिवंगत दिलबहादुर श्रेष्ठको अगुवाईमा विसं २०१६ सालमा स्थापित यस विद्यालयमा हाल कक्षा १२ सम्म १ हजार २५८ विद्यार्थी अध्ययनरत रहेको विद्यालय व्यवस्थापन समितिका अध्यक्ष दीपेन्द्र श्रेष्ठले जानकारी दिए ।