आज हरिशयनी एकादशी, तुलसीको बिरुवा साँरिदै
प्रकाशित मिति : 29 June, 2023 8:41 am
काठमाडौँ । आज आषाढ शुक्ल एकादशी अर्थात हरिशयनी एकादशी घर घरमा तुलसीको बिरुवा सारी मनाइँदै छ ।
आजदेखि चर्तुमास व्रत आराम्भ भएको छ । ज्येष्ठ शुक्ल एकादशीका दिन घरका मठमा राखेको बीज अंकुर भइ आजको दिन सारिन्छ । हरिशयनी एकादशीदेखि कार्तिक शुक्ल एकादशीसम्म तुलशीको विषेश पूजा गरिन्छ ।
यस अवधिलाई हिन्दुशास्त्र अनुसार चर्तुमास व्रत पनि भनिन्छ । सनातन वैदिक परम्पराअनुसार तुलसीलाई विष्णुको प्रतीकका रुपमा मानिन्छ।
हरिशयनी एकादशी देखि हरिबोधिनी एकादशीसम्म भगवान् विष्णु शयन गर्ने धार्मिक विश्वास रहेको छ । यस वर्ष भने साउन महिनामा अधिकमास परेकाले पाँच महिना हुने भएको छ।
आज बिहानैदेखि काठमाडौँको बूढानीलकण्ठ, उपत्यकाका चार नारायण लगायत देशभरका नारायण एवं विष्णु मन्दिरमा भक्तजनको भीड लाग्दछ ।