आज महानवमी, नवदुर्गा भगवतीको विशेष पूजा गरी मनाइँदै
काठमाडौँ । आज बडादशैँको नवौँ दिन महानवमी । आजको दिन नवदुर्गाको विशेष पूजा गरेर मनाइदैछ।
काठमाडौँको हनुमानढोका दरबार क्षेत्रमा रहेको तलेजु भवानीको मन्दिर वर्षमा एक दिन महानवमीमा मात्र खुला गरिन्छ ।
आज देशभरका शक्तिपीठमा नवदुर्गाको विशेष पूजा अर्चना गरिन्छ भने आजै बली दिने प्रचलन पनि रही आएको छ।
शक्तिपीठमा हाँस, कुखुरा, बोका, भेडा र राँगाको पञ्चबलि पनि दिने प्रचलन छ । शाकाहारीहरुले आजको दिनमा दिनमा कुभिण्डो, घिरौँला, मुला, काँक्रो र जटा नरिवलसमेत बलि दिने प्रचलन छ ।
महानवमी तिथिकै दिन चामुण्डा देवीले रक्तबीज राक्षसलाई वध गरेकाले महानवमी पर्वलाई विशेष महत्त्वका साथ पूजा गर्ने गरिन्छ।
आजै घटस्थापनाका दिनमा राखिएको जमरा विभिन्न शक्तिपीठमा लगी चढाइन्छ । महानवमीका अवसरमा हनुमानढोका दरबारका तथा देशभर रहेका नेपाली सेनाका ब्यारेक र गुल्महरूमा बाजागाजासहित जङ्गी निशाना पूजा र कोतपूजा गर्ने प्रचलन छ ।
