मुगुमा एकै परिवारका ४ जनाको सामुहिक हत्या

काठमाडौं । मुगुमा एकै परिवारका ४ जनाको हत्या भएको छ ।

मुगुको छायानाथ रारा नगरपालिका( ६ स्थित मन्दु गाउँमा एकै परिवारका आमासहित दुई छोरा र एक छोरी मृत अवस्थामा फेला परेकाे जिल्ला प्रहरी कार्यालय मुगुले जनाएको छ । प्रहरीका अनुसार उनीहरूकाे सामूहिक हत्या भएको हाे ।

छायानाथ रारा–६ मन्दु गाउँकी २८ वर्षीया श्रीदेवी बोहोरा, ११ वर्षीय छोरा मनोज, ९ वर्षीया छोरी अप्सरा र आठ महिनाका छोरा रहर मृत भेटिएका हुन् ।

धारिलो हतियार प्रहार गरी रातिको समयमा चार जनाको हत्या गरिएको जिल्ला प्रहरी कार्यालय मुगुका प्रहरी नायव उपरीक्षक विरेन्द्र थापाले जानकारी दिए ।

चारै जनाको शव परीक्षणका लागि जिल्ला अस्पताल मुगुमा ल्याइएको छ भने हत्या कसले के उद्देश्यले गर्‍यो भन्ने खुल्न सकेको छैन ।

श्रीदेवीका श्रीमान वैदेशिक रोजगारीमा रहेको प्रहरीले जनाएको छ ।